വീണ്ടും സൂപ്പർ ഓവർ; ഇന്ത്യക്ക് ജയം

News Desk

31 January 2020 04:53 PM

വെല്ലിങ്ടണ്‍: തുടർച്ചയായി രണ്ടാം മത്സരവും സൂപ്പര്‍ ഓവറിലേക്ക് നീണ്ടപ്പോൾ വീണ്ടും വിജയം ഇന്ത്യക്ക്. ഇന്ത്യ - ന്യൂസീലന്‍ഡിന് ട്വന്റി 20 പരമ്പരയിലെ നാലാം മത്സരവും സമനില ആയതോടെ ആണ് സൂപ്പർ ഓവറിലേക്ക് നീണ്ടത്. ബുംറയെറിഞ്ഞ സൂപ്പര്‍ ഓവറില്‍ ആദ്യം ബാറ്റു ചെയ്ത കിവീസ് ഒരു വിക്കറ്റ് നഷ്ടത്തില്‍ 13 റണ്‍സെടുത്തു. മറുപടിയായി ടിം സൗത്തിയുടെ ആദ്യ രണ്ടു പന്തില്‍ ഒരു സിക്‌സും ഫോറുമടക്കം 10 റണ്‍സെടുത്ത കെ.എല്‍ രാഹുല്‍ അടുത്ത പന്തില്‍ പുറത്തായി. അഞ്ചാം പന്തില്‍ ഫോറടിച്ച് ക്യാപ്റ്റന്‍ വിരാട് കോലി ഇന്ത്യയെ വിജയത്തിലെത്തിച്ചു.

നേരത്തെ ആദ്യം ബാറ്റ് ചെയ്‌തെ ഇന്ത്യ നിശ്ചിത ഓവറിൽ 8 വിക്കറ്റ് നഷ്ടത്തിലാണ് 165 റൺസെടുത്തത്. അർദ്ധ സെഞ്ച്വറി നേടിയ മനീഷ് പാണ്ഡെയുടെയും തകർത്തടിച്ച ലോകേഷ് രാഹുലിന്റെയും പ്രകടനമാണ് ഇന്ത്യയ്ക്ക് ഭേതപ്പെട്ട സ്കോർ സമ്മാനിച്ചത്. അവസരം ലഭിച്ച മലയാളി താരം സഞ്ജു സാംസണും നിരാശപ്പെടുത്തി.

ഇന്ത്യ ഉയര്‍ത്തിയ 166 റണ്‍സ് വിജയലക്ഷ്യം പിന്തുടര്‍ന്ന ന്യൂസീലന്‍ഡിന് ഏഴു വിക്കറ്റ് നഷ്ടത്തില്‍ 165 റണ്‍സെടുക്കാനേ സാധിച്ചുള്ളൂ. ഷാര്‍ദുല്‍ താക്കൂറെറിഞ്ഞ അവസാന ഓവറില്‍ കിവീസിന് ജയയത്തിലേക്ക് ഏഴു റണ്‍സ് വേണമായിരുന്നു. എന്നാല്‍ ടിം സെയ്‌ഫേര്‍ട്ട്, ഡാരില്‍ മിച്ചെല്‍, മിച്ചെല്‍ സാന്റ്‌നര്‍ എന്നിവരുടെ വിക്കറ്റുകള്‍ അവര്‍ക്ക് അവസാന ഓവറില്‍ നഷ്ടമായി. അവസാന പന്തില്‍ ജയിക്കാന്‍ രണ്ടു റണ്‍സ് വേണമെന്നിരിക്കെ രണ്ടാം റണ്ണിനായി ഓടുമ്പോൾ സാന്റ്‌നര്‍ റണ്‍ ഔട്ടായി.

അര്‍ധ സെഞ്ചുറി നേടിയ ഓപ്പണര്‍ കോളിന്‍ മണ്‍റോ, ടിം സെയ്‌ഫേര്‍ട്ട് എന്നിവരുടെ ഇന്നിങ്‌സുകളാണ് കിവീസിനെ നിശ്ചിത 20 ഓവറില്‍ 165-ല്‍ എത്തിച്ചത്. 39 പന്തുകള്‍ നേരിട്ട സെയ്‌ഫേര്‍ട്ട് മൂന്നു സിക്‌സും നാലു ഫോറുമടക്കം 57 റണ്‍സെടുത്തു. റോസ് ടെയ്‌ലര്‍ 24 റണ്‍സെടുത്ത് പുറത്തായി. ഇരുവരും നാലാം വിക്കറ്റില്‍ 62 റണ്‍സും കൂട്ടിച്ചേര്‍ത്തു. 47 പന്തില്‍ നിന്ന് മൂന്നു സിക്‌സും ആറു ബൗണ്ടറിയുമടക്കം 64 റണ്‍സെടുത്ത കോളിന്‍ മണ്‍റോയെ വിരാട് കോലി റണ്‍ ഔട്ടാക്കുകയായിരുന്നു. രണ്ടാം വിക്കറ്റില്‍ മണ്‍റോ - സെയ്‌ഫേര്‍ട്ട് സഖ്യം 74 റണ്‍സാണ് കിവീസ് സ്‌കോറിലേക്ക് ചേര്‍ത്തത്.