രാജ്യാന്തര ഡോക്യുമെന്ററി ഹ്രസ്വചലച്ചിത്രമേളയ്ക്ക് ഇന്ന് സമാപനം

News Desk

26 June 2019 10:43 AM

തിരുവനന്തപുരം : പന്ത്രണ്ടാമത് രാജ്യാന്തര ഡോക്യുമെന്ററി ഹ്രസ്വചലച്ചിത്രമേളയ്ക്ക് ബുധനാഴ‌്ച കൊടിയിറങ്ങും. വൈകിട്ട് 5.30ന് കൈരളി തിയറ്ററിൽ നടക്കുന്ന സമാപന സമ്മേളനത്തിൽ സ്പീക്കർ പി ശ്രീരാമകൃഷ്ണൻ മുഖ്യാതിഥിയാകും.

സാംസ്‌കാരിക മന്ത്രി എ കെ ബാലൻ അധ്യക്ഷനാവും. ഡോക്യുമെന്ററി സംവിധായിക മധുശ്രീ ദത്തയ‌്ക്ക‌് സമഗ്ര സംഭാവനാ പുരസ്‌കാരം നൽകി ആദരിക്കും. വിവിധ വിഭാഗങ്ങളിലെ പുരസ്‌കാരങ്ങൾക്കായി തെരഞ്ഞെടുക്കപ്പെട്ട ചിത്രങ്ങൾ സമാപന ചടങ്ങിൽ പ്രഖ്യാപിക്കും.മേളയിലെ മികച്ച ലോങ് ഡോക്യുമെന്ററിയായി തെരഞ്ഞെടുക്കപ്പെടുന്ന ചിത്രം നേരിട്ട് ഓസ്‌കർ പ്രവേശനത്തിന് അർഹമാകും. ഡോക്യുമെന്ററി മേഖലയ്ക്ക് രാജ്യാന്തര ഡോക്യുമെന്ററി ഹ്രസ്വചലച്ചിത്ര മേള നൽകുന്ന സംഭാവനകൾ പരിഗണിച്ച് അക്കാദമി ഓഫ് മോഷൻ പിക്‌ച്ചേഴ്‌സ് ആർട്‌സ് ആൻഡ‌് സയൻസാണ് ഈ അവസരം ഏർപ്പെടുത്തിയത്.