തിയ്യേറ്ററുകളെ പൂരപ്പറമ്പാക്കി പ്രഭാസിന്റെ സാഹോ!
ആകാംക്ഷകള്‍ക്കും കാത്തിരിപ്പിനുമൊടുവില്‍ പ്രഭാസിന്റെ സാഹോ ലോകമെമ്പാടുമുള്ള തിയ്യേറ്ററുകളിലേക്ക് എത്തിയിരിക്കുകയാണ്. ബാഹുബലി സീരിസിന്റെ വമ്പൻ വിജയത്തിന് ശേഷം രണ്ട് വര്‍ഷം കഴിഞ്ഞാണ് പ്രഭാസിന്റെ പുതിയ ചിത്രം എത്തിയിരിക്കുന്നത്. തെലുങ്ക് പതിപ്പിന് പുറമെ മലയാളം,തമിഴ്,ഹിന്ദി ഭാഷകളിലും സിനിമ പുറത്തിറങ്ങിയിട്ടുണ്ട്. 350 കോടി ബഡ്ജറ്റില്‍ ഒരുക്കിയ സിനിമ ആക്ഷന്‍ പാക്ക്ഡ് മാസ് എന്റര്‍ടെയ്‌നറായിട്ടാണ് എത്തിയിരിക്കുന്നത്.
ചിത്രത്തിന്റെതായി നേരത്തെ പുറത്തിറങ്ങിയ ട്രെയിലര്‍ തരംഗമായി മാറിയിരുന്നു. ലോകമെമ്പാടുമുള്ള തിയ്യേറ്ററുകളിലേക്ക് വമ്പൻ റിലീസായി എത്തിയ സാഹോയുടെ പ്രദര്‍ശനങ്ങള്‍ പുലര്‍ച്ചെ മുതല്‍ ആരംഭിച്ചിരുന്നു.
ബ്രഹ്മാണ്ഡ ചിത്രത്തിന്റെ ആദ്യ ഷോകള്‍ അവസാനിച്ചതോടെ സോഷ്യല്‍ മീഡിയയില്‍ പ്രേക്ഷക പ്രതികരണങ്ങള്‍ വന്നിരിക്കുകയാണ്. ഇന്ത്യയില്‍ മാത്രമായി 10000 സ്‌ക്രീനുകളിലാണ് സാഹോ റിലീസ് ചെയ്തിരിക്കുന്നത്. രജനീകാന്തിന്റെ 2.0യുടെ റെക്കോര്‍ഡാണ് പ്രഭാസ് ചിത്രം മറികടന്നിരിിക്കുന്നത്. ആന്ധ്ര,തെലുങ്കാന എന്നീ സംസ്ഥാനങ്ങളില്‍ മാത്രം 2000 സ്‌ക്രീനുകളില്‍ ചിത്രം റിലീസ് ചെയ്തിരിക്കുന്നു.
യുഎഇയില്‍ കഴിഞ്ഞ ദിവസം എത്തിയ സാഹോ ചില സൗത്ത് ഇന്ത്യന്‍ തിയ്യേറ്ററുകളില്‍ പുലര്‍ച്ചെ ഒരു മണി മുതല്‍ പ്രദര്‍ശനം ആരംഭിച്ചതായി റിപ്പോര്‍ട്ടുകള്‍ വന്നിരുന്നു. സാഹോ കണ്ട ശേഷം ആരാധകരും സിനിമാ പ്രേമികളുമടക്കം നിരവധി പേര്‍ ട്വിറ്ററിലൂടെയും മറ്റു സോഷ്യല്‍ മീഡിയ പേജുകളിലൂടെയുമായി തങ്ങളുടെ അഭിപ്രായങ്ങള്‍ പങ്കുവെക്കുന്നുണ്ട്. സാഹോ ഒരു പൈസ വസൂല്‍ എന്റര്‍ടെയ്‌നറാണെന്നാണ് ബ്രഹ്മാണ്ഡ ചിത്രത്തെക്കുറിച്ചുളള ആദ്യ പ്രേക്ഷക പ്രതികരണങ്ങള്‍ വരുന്നത്.