കേന്ദ്ര ബജറ്റ്; കേരളത്തിലെ റെയിൽവേ വികസനത്തിന് പല പദ്ധതികൾക്കും 1000 രൂപ വീതം
കേന്ദ്ര ബജറ്റിൽ റെയിൽവേ വകുപ്പിൽ കേരളത്തിനു നിരാശ. ബജറ്റ് രേഖകൾ അനുസരിച്ചു കോട്ടയം വഴിയുളള പാത ഇരട്ടിപ്പിക്കലിനു മാത്രം ചെലവാക്കാൻ കഴിയുന്ന പണമാണ് അനുവദിച്ചിട്ടുള്ളത്. കോട്ടയം പാത ഇരട്ടിപ്പിക്കലിനു 88.60 കോടി രൂപയും അമ്പലപ്പുഴ- ഹരിപ്പാട് പാത ഇരട്ടിപ്പിക്കലിനു 13.95 കോടി രൂപയും ലഭിക്കും.
എന്നാൽ തിരുവനന്തപുരം – കന്യാകുമാരി പാത ഇരട്ടിപ്പിക്കലിനു 133.5 കോടി രൂപ നീക്കിവച്ചിട്ടുണ്ടെങ്കിലും ഇതിൽ 5 കോടി രൂപ മാത്രമേ ഭൂമി ഏറ്റെടുക്കാൻ ഉപയോഗിക്കാൻ കഴിയൂ. ഭൂമിയേറ്റെടുത്ത പദ്ധതികളിൽ മാത്രം ചെലവാക്കാൻ കഴിയുന്ന എക്സ്ട്രാ ബജറ്ററി റിസോഴ്സിന്റെ (ഇബിആർ) കൂട്ടത്തിലാണു ബാക്കിയുളള 128 കോടി രൂപ. ഈ തുക ചെലവാക്കണമെങ്കിൽ 217 കോടി രൂപ മുടക്കി തിരുവനന്തപുരം മുതൽ നേമം വരെയുളള ഭാഗത്തെ ഭൂമി ഏറ്റെടുക്കണം. അതിനു പണമില്ല.
റെയിൽവേ മന്ത്രി തറക്കല്ലിട്ട നേമം ടെർമിനലിനും അവഗണയാണ്. ഒന്നാം ഘട്ടത്തിന് 132 കോടി രൂപ ആവശ്യമായ പദ്ധതിക്ക് 50 ലക്ഷം രൂപയാണു വകയിരുത്തിയിരിക്കുന്നത്. മുൻപു നേമത്തിന് അനുവദിച്ച 23 കോടി രൂപ കൂടി ദക്ഷിണ റെയിൽവേ തൂത്തുകുടി– അറപ്പുകോട്ട പാത നിർമാണത്തിനായി വകമാറ്റി. കൊച്ചുവേളിയിലും എറണാകുളത്തും ഓട്ടമാറ്റിക് കോച്ച് വാഷിങ് പ്ലാന്റിന് 1.73 കോടി രൂപ നീക്കി വച്ചിട്ടുണ്ട്.
കേരളത്തിന് റെയിൽവേ വികസനത്തിന് അനുവദിച്ചവ ഇങ്ങനെ :
- ശബരി റെയിൽവേ – 1000 രൂപ
- പാലക്കാട് കോച്ച് ഫാക്ടറി– 1000 രൂപ
- എറണാകുളം –അമ്പലപ്പുഴ പാത ഇരട്ടിപ്പിക്കൽ– 3000 രൂപ
- ഹരിപ്പാട്–അമ്പലപ്പുഴ പാത ഇരട്ടിപ്പിക്കൽ– 13.95 കോടി
- കോട്ടയം പാത ഇരട്ടിപ്പിക്കൽ– 88 കോടി
- നേമം ടെർമിനൽ –50 ലക്ഷം
- എറണാകുളം– ഷൊർണൂർ മൂന്നാം പാത– 1000 രൂപ
- ഓട്ടമാറ്റിക് കോച്ച് വാഷിങ് പ്ലാന്റ് എറണാകുളം, കൊച്ചുവേളി – 1.73 കോടി
- പിറ്റ്ലൈൻ ക്യാറ്റ് വോക്ക് എറണാകുളം– 90 ലക്ഷം
- ഗുരുവായൂർ– തിരുനാവായ പാത– 1000 രൂപ
- തിരുവനന്തപുരം – കന്യാകുമാരി പാത ഇരട്ടിപ്പിക്കൽ– 133.5 കോടി (ചെലവാക്കാൻ കഴിയുന്നത് 5 കോടി)
- കൊച്ചുവേളി അഡീഷണൽ പ്ലാറ്റ്ഫോം – ഇല്ല
- ചെങ്ങന്നൂർ സ്റ്റേഷൻ വികസനം– ഇല്ല
- കൊല്ലം മെമു ഷെഡ് വികസനം– ഇല്ല
- പാലക്കാട് ബൈപ്പാസ് ലൈൻ– ഇല്ല
- പാലക്കാട് പിറ്റ്ലൈൻ– ഇല്ല
- ഷൊർണൂർ യാഡിൽ നിന്നുളള ഒരു കിലോമീറ്റർ പാത ഇരട്ടിപ്പിക്കൽ– ഇല്ല
- കൊല്ലം പിറ്റ്ലൈൻ– ഇല്ല
- 2 പുതിയ ഇന്റർമീഡിയറ്റ് ബ്ലോക്ക് സെക്ഷൻ ആലപ്പുഴ റൂട്ടിൽ – ഇല്ല
- എൽഎച്ച്ബി കോച്ച് ഹാൻഡിലിങ് ഫെസിലിറ്റി, എറണാകുളം– ഇല്ല
- നിലമ്പൂർ ഷൊർണൂർ സെക്ഷനിൽ ക്രോസിങ് സ്റ്റേഷനുകൾ– ഇല്ല