രണ്ടു വയസുകാരി ഇഷാനിയെ കെട്ടിപ്പിടിച്ച്‌ ഹൃദയം തകര്‍ന്ന് മുത്തശ്ശി
നെയ്യാറ്റിന്‍കര: 'ഈ പൊന്നുകുഞ്ഞിന് ഇനി ആരു പാലുകൊടുക്കുമെന്ന് ആരെങ്കിലും പറയൂ' ഹൃദയം തകര്‍ന്നുള്ള നിലവിളി നെയ്യാറ്റിന്‍കര ഊരൂട്ടുകാല 'തിരുവോണം' വീട്ടില്‍ നിന്ന് ഉയരുമ്പോൾ കൂടി നിന്നവര്‍ക്ക് കണ്ണീരടക്കാനായില്ല. അച്ഛനും അമ്മയും വിടവാങ്ങിയത് തിരിച്ചറിയാനുള്ള പ്രായമെത്താത്ത കുഞ്ഞ് ഇഷാനിയെ കൈയ്യിലെടുത്ത് മുത്തശ്ശിയായ സരസ്വതിയമ്മ വിലപിക്കുമ്പോൾ വിതുമ്പൽ ചുറ്റുമുയരുന്നുണ്ടായിരുന്നു. എന്നാല്‍ ചലനമറ്റ് കിടക്കുന്ന മാതാപിതാക്കളായ സൗമ്യയേയും രാഹുലിനേയും നോക്കി ഒന്നുമറിയാതെ ഇഷാനി ആള്‍ക്കൂട്ടം കണ്ടു പകച്ചും പെട്ടിക്കുള്ളില്‍ അച്ഛനുമമ്മയും കിടക്കുന്നതു നോക്കിയും അവളുടെ കളിചിരികള്‍ തുടരുകയായിരുന്നു. അച്ഛനും അമ്മയും എന്താണ് എഴുന്നേല്‍ക്കാത്തത് എന്നുമാത്രമായിരുന്നു അവളുടെ സംശയം.
തിങ്കളാഴ്ച രാവിലെയോടെ മകളെ അവളുടെ മുത്തശ്ശിയെ ഏല്‍പ്പിച്ച്‌ സന്തോഷത്തോടെ ഒരു വിവാഹ ചടങ്ങില്‍ പങ്കെടുക്കാനായി ഇറങ്ങിയതായിരുന്നു യുവദമ്പതികളായ സൗമ്യയും രാഹുലും. എന്നാല്‍ റോഡപകടത്തിന്റെ രൂപത്തില്‍ പാതിവഴിയില്‍ വെച്ച്‌ അവരെ മരണം തട്ടിയെടുത്തു. രണ്ട് വയസുള്ള മകള്‍ ഇഷാനിയെ ഒപ്പം കൂട്ടാതിരുന്നതിനാല്‍ അവള്‍ അപകടത്തില്‍ നിന്നും രക്ഷപ്പെട്ടു. കടമ്പാട്ടുകോണത് ഇന്നലെ പതിനൊന്ന് മണിക്ക് കാറും കെഎസ്ആര്ടിസി വോള്‍വോ ബസും കൂട്ടിയിടിച്ചുണ്ടായ അപകടമാണ് കുഞ്ഞ് ഇഷാനിയെ അനാഥയാക്കിയത്. തിരുവനന്തപുരം നെയ്യാറ്റിന്‍കര ഊരുട്ടുകാല തിരുവോണത്തില്‍ ജനാര്‍ദനന്‍ നായരുടെ മകനായ ജെ രാഹുല്‍ (28) പൊതുമരാമത്ത് വകുപ്പ് കാഞ്ഞിരംകുളം ഡിവിഷന്‍ ഓവര്‍സീയറാണ്. ഭാര്യ സൗമ്യ (24) അഞ്ചല്‍ ബ്ലോക്ക് പഞ്ചായത്ത് ഓവര്‍സീയറായി ജോലി ചെയ്ത് വരികയായിരുന്നു.
Related News