ചൈനീസ് ആപ്പുകള് നിരോധിച്ച ഇന്ത്യയുടെ തീരുമാനത്തെ പിന്തുണച്ച് അമേരിക്ക
ന്യൂഡല്ഹി: ചൈനീസ് ആപ്പുകള് നിരോധിച്ച ഇന്ത്യയുടെ തീരുമാനത്തിന് പിന്തുണയുമായി അമേരിക്ക. ഇന്ത്യയുടെ തീരുമാനം ദേശീയസുരക്ഷയ്ക്ക് വലിയ സഹായമാകുമെന്ന് വിദേശകാര്യ സെക്രട്ടറി മൈക്ക് പോംപിയോ പറഞ്ഞു."ചില മൊബൈല് ആപ്ലിക്കേഷനുകള് ഇന്ത്യ നിരോധിക്കുന്നത് ഞങ്ങള് സ്വാഗതം ചെയ്യുന്നു. ഇന്ത്യയുടെ സമഗ്രതയും ദേശീയ സുരക്ഷയും ഈ നടപടിയിലൂടെ വര്ധിക്കും," എന്ന് പോംപിയോ മാധ്യമങ്ങളോട് പറഞ്ഞു.
ചൈനയുമായുള്ള അതിര്ത്തി തര്ക്കത്തിന് പിന്നാലെ 59 ചൈനീസ് മൊബൈല് ആപ്ലിക്കേഷന്സാണ് കേന്ദ്ര സര്ക്കാര് നിരോധിച്ചത്. ടിക്ടോക്ക്, യുസി ബ്രൗസര് ഹലോ, എക്സെന്ഡര്, യൂക്യാം ഉള്പ്പടെയുള്ള ആപ്ലിക്കേഷന്സ് കേന്ദ്രം നിരോധിച്ചിട്ടുണ്ട്. ചൈനീസ് ആപ്ലിക്കേഷന്സ് നിരോധിക്കണമെന്ന് ആവശ്യപ്പെട്ട് നേരത്തെ രാജ്യത്തിന്റെ പല ഭാഗങ്ങളിലും പ്രതിഷേധം ശക്തമായിരുന്നു.
ജനപ്രിയ ആപ്ലിക്കേഷന്സായി ടിക്ടോക്, ഷെയര്ഇറ്റ്, യുസി ബ്രൗസര്, ഹലോ, ലൈക്കീ, യൂക്യാം മേക്ക്അപ്പ്, വീചാറ്റ്, വിഗോ വീഡിയോ ഉള്പ്പടെ 59 ആപ്ലിക്കേഷന്സാണ് നിരോധിച്ചിരിക്കുന്നത്. ഇന്ത്യയുടെ പരമാധികാരത്തിനും സമഗ്രതയ്ക്കും ദേശീയ സുരക്ഷയ്ക്കും പ്രതിരോധത്തിനും ആത്യന്തികമായി തടസ്സമാകുന്ന വിഷയങ്ങള് വലിയ ആശങ്കയാണെന്നും ഇതില് അടിയന്തര നടപടി ആവശ്യമാണെന്നും കേന്ദ്രം പറയുന്നു.
"ഡാറ്റാ സുരക്ഷയുമായി ബന്ധപ്പെട്ട കാര്യങ്ങളിലും 130 കോടി ഇന്ത്യക്കാരുടെ സ്വകാര്യത പരിരക്ഷിക്കുന്നതിലും ആശങ്കയുണ്ട്. ഇത്തരം ആശങ്കകള് നമ്മുടെ രാജ്യത്തിന്റെ പരമാധികാരത്തിനും സുരക്ഷയ്ക്കും ഭീഷണിയാണെന്ന് അടുത്തിടെ ശ്രദ്ധയില് പെട്ടിട്ടുണ്ട്. ഇന്ത്യയ്ക്ക് പുറത്തുള്ള സ്ഥലങ്ങളുള്ള സെര്വറുകളിലേക്ക് ഉപയോക്താക്കളുടെ ഡാറ്റ അനധികൃതമായി മോഷ്ടിക്കുന്നതിനും രഹസ്യമായി കൈമാറുന്നതിനുമായി ആന്ഡ്രോയ്ഡ്, ഐഒഎസ് പ്ലാറ്റ്ഫോമുകളില് ലഭ്യമായ ചില മൊബൈല് ആപ്ലിക്കേഷനുകള് ദുരുപയോഗം ചെയ്യുന്നതിനെക്കുറിച്ചുള്ള നിരവധി റിപ്പോര്ട്ടുകള് ഉള്പ്പെടെ നിരവധി ഉറവിടങ്ങളില് നിന്ന് വിവര സാങ്കേതിക മന്ത്രാലയത്തിന് നിരവധി പരാതികള് ലഭിച്ചിട്ടുണ്ട്." ഇക്കാരണത്താലാണ് ആപ്ലിക്കേഷനുകള് നിരോധിക്കുന്നു എന്നായിരുന്നു കേന്ദ്രത്തിന്റെ വിശദീകരണം.
ഈ ആപ്ലിക്കേഷനുകള് വിലക്കുകയോ അവയുടെ ഉപയോഗം സംബന്ധിച്ച് ഉപയോക്താക്കള്ക്ക് നിര്ദേശം നല്കുകയോ ചെയ്യണം എന്ന് ഇന്ത്യയിലെ രഹസ്യാന്വേഷണ ഏജന്സികള് സര്ക്കാരിന് നിര്ദേശം നല്കിയതിനെതുടര്ന്നാണ് നിരോധനം.