ട്രിപ്പിള് ലോക്ക്ഡൗണ് ; തിരുവനന്തപുരത്ത് കടുത്ത നടപടിയുമായി പോലീസ്
തിരുവനന്തപുരം; തലസ്ഥാനത്ത് ട്രിപ്പിള് ലോക്ക്ഡൗണ് നടപടികള് കടുപ്പിച്ച് പോലീസ്. നഗരത്തിനുള്ളിലേക്ക് അത്യാവശ്യക്കാര്ക്ക് മാത്രമാണ് പ്രവേശനം നല്കിയിരിക്കുന്നത്. കൃത്യമായ രേഖകളില്ലാതെ ആരെയും കടത്തി വിടില്ലെന്ന സാഹചര്യമാണിപ്പോള് തലസ്ഥാനത്തുള്ളത്. ഇന്ന് രാവിലെ മുതല് വാഹനങ്ങളുടെ എണ്ണം ഇതോടെ നഗരത്തിനുള്ളില് കുറഞ്ഞു.
നഗരാതിര്ത്തികളില് കര്ശന പരിശോധനയാണ് പോലീസ് നടത്തുന്നത്. രാവിലെ വിവിധ ആവശ്യങ്ങള് പറഞ്ഞ് എത്തിയ അനലധി യാത്രക്കാരെ പോലീസ് തിരിച്ചയച്ചു. 100 കോര്പ്പറേഷന് വാര്ഡുകളും പൂര്ണ്ണമായും അടച്ചു. പ്രധാനപ്പെട്ട 4 നഗരാതിര്ത്തികളിലും കര്ശന പരിശോധന നടത്തിവരികയാണ്. പലചരക്കു കടകളും പച്ചക്കറിക്കടകളും തുറക്കാന് അനുവാദം നല്കിയിച്ചുണ്ടെങ്കിലും പൊതുജനങ്ങള് സാധനം വാങ്ങാനായി കടകളിലേക്ക് കൂട്ടത്തോടെ ഇറങ്ങാന് അനുവദിക്കില്ല. അത്യാവശ്യ ആവശ്യങ്ങള്ക്ക് പോലീസ് സ്റ്റേഷനുമായി ബന്ധപ്പെടാം.
കോര്പ്പറേഷന് മേഖലയില് ആശുപത്രികള്, മെഡിക്കല് ഷോപ്പുകള്, പലചരക്കുകടകള് എന്നിവ മാത്രമേ തുറന്നുപ്രവര്ത്തിക്കാന് അനുമതിയുള്ളൂ. സെക്രട്ടറിയേറ്റ് ഉള്പ്പെടെയുള്ള ഒരു സര്ക്കാര് ഓഫീസുകളും സ്ഥാപനങ്ങളും ഇക്കാലയളവില് തുറന്നു പ്രവര്ത്തിക്കില്ല.
ചില സേവനങ്ങളും സ്ഥാപനങ്ങളും തിരുവനന്തപുരം കോര്പ്പറേഷന് പരിധിയിലെ ട്രിപ്പിള് ലോക്ഡൗണില് നിന്ന് ഒഴിവാക്കിയിട്ടുണ്ട്. എയര്പോര്ട്ട്, വിമാനസര്വീസുകള്, ട്രെയിന് യാത്രക്കാര് എന്നിവയുമായി ബന്ധപ്പെട്ട് ഈ സ്ഥാപനങ്ങളിലേക്കും തിരിച്ചുമുള്ള യാത്രകള്ക്ക് ആവശ്യമായ ടാക്സി, എ.ടി.എം ഉള്പ്പെടെയുള്ള അത്യാവശ്യ ബാങ്കിങ് സേവനങ്ങള്, ഡേറ്റ സെന്റര് ഓപ്പറേറ്റര്മാരും അതുമായി ബന്ധപ്പെട്ട പ്രവര്ത്തനങ്ങളും, മൊബൈല് സര്വ്വീസ് സേവനവുമായി ബന്ധപ്പെട്ട അത്യാവശ്യജീവനക്കാര്, ആശുപത്രികളും മെഡിക്കല് ഷോപ്പുകളും, ചരക്കുവാഹനങ്ങളുടെ യാത്ര, അത്യാവശ്യ പലചരക്കുകടകളുടെ പ്രവര്ത്തനം, വളരെ അത്യാവശ്യമുളള മാധ്യമപ്രവര്ത്തകരുടെ സേവനം, പെട്രോള് പമ്പ്, എല്.പി.ജി, ഗ്യാസ് സ്ഥാപനങ്ങള്, ജല വിതരണം, വൈദ്യുതി, ശുചീകരണം എന്നിവയുമായി ബന്ധപ്പെട്ട പ്രവര്ത്തനങ്ങള്, എന്നിവയാണ് ലോക്ക്ഡൗണില് നിന്ന് ഒഴിവാക്കിയതായി സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു.
സഹായം ആവശ്യമുള്ളവര്ക്ക് താഴെ പറയുന്ന ഫോണ് നമ്പറുകളിൽ ബന്ധപ്പെടാം
സ്റ്റേറ്റ് പോലീസ് കണ്ട്രോള് റൂം - 112
തിരുവനന്തപുരം സിറ്റി പോലീസ് കണ്ട്രോള് റൂം - 0471 2335410, 2336410, 2337410
സംസ്ഥാന പോലീസ് മേധാവിയുടെ കണ്ട്രോള് റൂം - 0471 2722500, 9497900999