സംസ്ഥാനത്തെ ആദ്യ കോറോണ പോലീസ് ഔട്ട് പോസ്റ്റ് തുറന്നു

News Desk

22 April 2020 02:07 PM

ഇടുക്കി : നിരോധനാജ്ഞ നിലനിൽക്കുന്ന ഇടുക്കി അതിർത്തി മേഖലകളിലെ വനപാതകളിലൂടെ ലോക്ക് ഡൗണ്‍ ഇളവിന്റെ മറവില്‍ തമിഴ് നാട്ടിൽ നിന്നുള്ള കടന്നുകയറ്റം വർധിക്കുന്നു. പരിശോധനയില്ലാത്ത രാത്രികാലത്താണ് നുഴഞ്ഞു കയറ്റം. കഴിഞ്ഞ ദിവസങ്ങളില്‍ രാത്രിയുടെ മറവില്‍ അതിർത്തി കടന്നെത്തിയത് ഇരുപതോളം പേരെന്ന് സ്പെഷ്യൽ ബ്രാഞ്ച് റിപ്പോർട്ട്. എറ്റവും കൂടുതൽ ആളുകൾ അതിർത്തി കടന്ന തേവാരംമേട്ടിൽ സംസ്ഥാനത്തെ ആദ്യ കോറോണ പോലീസ് ഔട്ട് പോസ്റ്റ് തുറന്നു.

രാത്രി കാലങ്ങളിൽ അതിർത്തി കടന്നെത്തുന്നവർ ഏറ്റവും പ്രധാനമായി ഉപയോഗിക്കുന്നത് നെടുങ്കണ്ടം തേവാരം മേട്ടിലെ സമാന്തര പാതകളെയാണ്. ജില്ലയിൽ നിന്നും ഏറ്റവും എളുപ്പം തമിഴ്നാട്ടിലേക്ക് എത്തുന്ന മേഖലയാണിത്. മൂന്നു കിലോമീറ്റർ കാട്ടിലൂടെ സഞ്ചരിച്ചാൽ കേരളത്തിലേക്ക് കടക്കാം. അതിര്‍ത്തി കടന്നെത്തുന്നവരെ വാഹനങ്ങളില്‍ കൂട്ടി കൊണ്ടുപോകുവാനും ഏലത്തോട്ടങ്ങൾ കേന്ദ്രീകരിച്ച് പ്രത്യേക സംഘങ്ങൾ പ്രവര്‍ത്തിക്കുന്നുള്ളതായാണ് റിപ്പോർട്ട്‌. ഇത് കണക്കിലെടുത്താണ് സംസ്ഥാനത്തെ ആദ്യ കൊറോണ ഔട്ട് പോസ്റ്റ് തേവാരം മേട്ടിൽ തുറന്നത്.