കേന്ദ്ര സര്ക്കാര് പ്രത്യേക വിമാനം എപ്പോള് അനുവദിച്ചാലും പ്രവാസികളെ സ്വീകരിക്കാന് സംസ്ഥാനം സജ്ജമായിരിക്കും; മുഖ്യമന്ത്രി പിണറായി വിജയൻ | VIDEO
കേന്ദ്ര സര്ക്കാര് പ്രത്യേക വിമാനം എപ്പോള് അനുവദിച്ചാലും പ്രവാസികളെ സ്വീകരിക്കാന് സംസ്ഥാനം സജ്ജമായിരിക്കുമെന്നു മുഖ്യമന്ത്രി പിണറായി വിജയൻ. പ്രവാസികള് തിരിച്ചുവരുമ്പോള് സജ്ജീകരണങ്ങളും സൗകര്യങ്ങളും ഉറപ്പാക്കുന്നതിന് സെക്രട്ടറിതല സമിതി രൂപീകരിച്ചിട്ടുണ്ട്. പ്രാഥമിക കണക്കനുസരിച്ച് മലപ്പുറം, കോഴിക്കോട്, കണ്ണൂര്, തൃശൂര് ജില്ലകളിലേക്കാണ് കൂടുതല് പേര് എത്തുക. ഓരോ വിമാനത്തിലും വരുന്ന യാത്രക്കാരുടെ വിവരം വിമാനം പുറപ്പെടും മുമ്പു തന്നെ ലഭ്യമാക്കണമെന്ന് സിവില് ഏവിയേഷന് മന്ത്രാലയത്തോടും വിദേശകാര്യ മന്ത്രാലയത്തോടും ആവശ്യപ്പെടും.
കലക്ടര്മാരുടെ നേതൃത്വത്തില് ഓരോ വിമാനത്താവളം കേന്ദ്രീകരിച്ചും പ്രത്യേക കമ്മിറ്റി രൂപീകരിക്കും. എയര്പോര്ട്സ് അതോറിറ്റി ഓഫ് ഇന്ത്യയുടെയും, പൊലീസിന്റെയും, ആരോഗ്യവകുപ്പിന്റെയും പ്രതിനിധികള് ഈ കമ്മിറ്റിയില് ഉണ്ടാകും. വിമാനത്താവളത്തില് വൈദ്യപരിശോധനക്ക് സൗകര്യമുണ്ടാകും. ഇതിന് വേണ്ടത്ര കൗണ്ടറുകള് ഏര്പ്പെടുത്തും. രോഗലക്ഷണം ഇല്ലാത്തവരെ വീടുകളില് ക്വാറന്റൈന് ചെയ്യാനാണ് ഉദ്ദേശിക്കുന്നത്. പൊലീസിന്റെ നിരീക്ഷണത്തിലായിരിക്കും വിമാനത്താവളത്തില് നിന്ന് അവരെ വീടുകളിലേക്ക് അയക്കുന്നത്. നേരെ വീടുകളില് എത്തി എന്ന് ഉറപ്പാക്കാനാണിത്.
വീടുകളില് നിരീക്ഷണത്തിലുള്ളവര്ക്ക് കൃത്യമായ വൈദ്യ പരിശോധന ഉറപ്പാക്കും. ആരോഗ്യ പ്രവര്ത്തകള് കൃത്യമായ ഇടവേളകളില് ഇവരെ വീടുകളില് സന്ദര്ശിക്കും. വീടുകളില് ക്വാറന്റൈനിലുള്ളവരെ നിരീക്ഷിക്കുന്നതിന് വാര്ഡ്തല സമിതികള്ക്ക് ചുമതല നല്കും. വീടുകളില് ക്വാറന്റൈനില് കഴിയാത്തവര്ക്ക് സര്ക്കാര് ഒരുക്കുന്ന ക്വാറന്റൈനില് കഴിയാം. രോഗലക്ഷണങ്ങള് സംശയിക്കുന്നവരെ പ്രത്യേക വാഹനത്തില് സര്ക്കാര് തന്നെ ക്വാറന്റൈനിലേക്ക് കൊണ്ടുപോകും.
പ്രവാസികളെ താമസിപ്പിക്കുന്നതിന് എയര്പോര്ട്ടുകള്ക്ക് സമീപം ആവശ്യമായ സൗകര്യം സര്ക്കാര് ഒരുക്കുന്നുണ്ട്. അതുപോലെ ആശുപത്രികളും ഇപ്പോള് തന്നെ സജ്ജമാണ്. കപ്പല് വഴി പ്രവാസികളെ കൊണ്ടുവരാന് കേന്ദ്രം തീരുമാനിക്കുകയാണെങ്കില് തുറമുഖങ്ങള് കേന്ദ്രീകരിച്ചും സജ്ജീകരണം ഏര്പ്പെടുത്തും. തിരിച്ചുവരാന് ആഗ്രഹിക്കുന്ന 2.76 ലക്ഷത്തിലധികം പേര് നോര്ക്ക റൂട്ട്സിന്റെ വെബ്സൈറ്റില് രജിസ്റ്റര് ചെയ്തിട്ടുണ്ട്.150ല്പരം രാജ്യങ്ങളില് നിന്നുള്ളവര് രജിസ്റ്റര് ചെയ്തിട്ടുണ്ട്.