കരവാരം കുടുംബാരോഗ്യ കേന്ദ്രത്തിലെ പുതിയ മന്ദിരം ഇന്ന് ഉദ്ഘാടനം ചെയ്യും
ആറ്റിങ്ങൽ : കരവാരം കുടുംബാരോഗ്യ കേന്ദ്രത്തിലെ പുതിയ മന്ദിരം ബഹു: ദേവസ്വം ടൂറിസം സഹകരണ വകുപ്പ് മന്ത്രി ശ്രീ. കടകംപള്ളി സുരേന്ദ്രൻ ഇന്ന് ഉദ്ഘാടനം ചെയ്യും. ഈ സർക്കാർ അധികാരം ഏറ്റ ശേഷം സംസ്ഥാനത്തെ വിവിധ പ്രാഥമിക ആരോഗ്യ കേന്ദ്രങ്ങളെ കുടുംബാരോഗ്യ കേന്ദ്രങ്ങളാക്കി മാറ്റുന്നതിന്റെ ഭാഗമായി കരവാരത്തെ പ്രാഥമികാരോഗ്യകേന്ദ്രത്തെ കുടുംബാരോഗ്യ കേന്ദ്രം ആക്കി മാറ്റുകയായിരുന്നു.
അതിന്റെ ഭാഗമായി ആറ്റിങ്ങൽ എംഎൽഎ അഡ്വ.ബി സത്യന്റെ എംഎൽഎ ഫണ്ടിൽ നിന്ന് 60 ലക്ഷത്തോളം രൂപ അനുവദിച്ച് മന്ദിരവും അനുബന്ധ സൗകര്യങ്ങളും ഏർപ്പെടുത്തുകയായിരുന്നു. കരവാരം പ്രദേശത്തെ ജനങ്ങളുടെ ദീർഘകാല അഭിലാഷത്തിനാണ് ഇതോടെ ഒരു പരിധിവരെ പരിഹാരമാകുന്നത്. കുടുംബാരോഗ്യ കേന്ദ്രമായി ഉയർന്നതിനെതുടർന്ന് രാവിലെ ഒൻപത് മുതൽ വൈകുന്നേരം ആറു മണി വരെ ഒപി സമയം ക്രമീകരിക്കുകയും, ഇത്രയും സമയം ഡോക്ടറുടെ സേവനം ആശുപത്രിയിൽ ലഭ്യമാവുകയും ചെയ്യുന്നു . പ്രാഥമികാരോഗ്യകേന്ദ്രത്തിൽ ഒരു ഡോക്ടറുടെ സേവനം ആണ് ലഭ്യമായിരുന്നത് എങ്കിൽ കുടുംബാരോഗ്യ കേന്ദ്രത്തിൽ മൂന്ന് ഡോക്ടർമാരുടെ സേവനം അതേസമയം ലഭ്യമാകുന്നു .