തിരുവനന്തപുരം അന്താരാഷ്ട്ര വൈറോളജി ഇന്സ്റ്റിട്ട്യൂറ്റ്യൂന്റെ ആദ്യഘട്ട ഉദ്ഘാടനം ഇന്ന്
തിരുവനന്തപുരം: തിരുവനന്തപുരം തോന്നയ്ക്കലിലെ അന്താരാഷ്ട്ര വൈറോളജി ഇന്സ്റ്റിട്ട്യൂറ്റ്യൂന്റെ ആദ്യഘട്ട ഉദ്ഘാടനം ഇന്ന് നടക്കും. മുഖ്യമന്ത്രി പിണറായി വിജയന് വീഡിയോ കോണ്ഫറന്സിലൂടെയാണ് ഉദ്ഘാടനം നിര്വഹിക്കുക.
കോവിഡ് ഉള്പ്പെടെയുള്ള വൈറസ് രോഗങ്ങളെ തടയുന്നതിനും നിയന്ത്രിക്കുന്നതിനുമുള്ള ഉന്നത ഗവേഷണത്തിനായാണ് തോന്നയ്ക്കലിലെ വൈറോളജി ഇന്സ്റ്റിറ്റ്യൂട്ട് ഒരുങ്ങുന്നത്. വൈറസ് രോഗനിര്ണയത്തിനാവശ്യമായ ആര് റ്റി പി സി ആര്, മറ്റ് ഗവേഷണാവശ്യങ്ങള്ക്കുള്ള ജെല് ഡോക്യുമെന്റേഷന് സിസ്റ്റം തുടങ്ങി ആദ്യഘട്ട പ്രവര്ത്തനങ്ങള്ക്ക് വേണ്ട ഉപകരണങ്ങളെല്ലാം സജ്ജമായി.
രണ്ട് ഘട്ടമായാണ് ഇന്സ്റ്റിറ്റ്യൂട്ടിന്റെ പ്രവര്ത്തനം വിഭാവനം ചെയ്തിട്ടുള്ളത്. ആദ്യഘട്ടത്തിന്റെ പ്രവര്ത്തനം ജൂണിലാണ് തുടങ്ങാനിരുന്നത്. എട്ട് വിഭാഗങ്ങളിലായി 160 ലധികം വിദഗ്ധരെ നിയമിക്കാനാണ് പദ്ധതി. രോഗനിര്ണയ സംവിധാനത്തോട് അനുബന്ധിച്ചുള്ള ക്ലിനിക്കല് വൈറോളജിയും വൈറല് ഡയഗനോസ്റ്റിക്സുമാണ് നിലവില് തുടങ്ങുന്ന രണ്ട് വിഭാഗങ്ങള്.