കൊച്ചിയില്‍ യാത്രക്കാരെ കുത്തിനിറച്ചോടി ബസ്; പിടിച്ചെടുത്തു: നടപടി

Ajith.A

08 June 2020 02:36 PM

ലോക്ഡൗണ്‍ ഇളവുകള്‍ ഒന്നൊന്നായി പിന്‍വലിക്കുന്നതിനു പിന്നാലെ ബസ് സര്‍വീസുകള്‍ കുറയുന്നത് യാത്രക്കാരെ വലയ്ക്കുന്നു. സര്‍ക്കാര്‍ ഓഫിസുകള്‍ പൂര്‍ണമായി തുറന്ന ഇന്ന് സ്വകാര്യബസുകള്‍ കുറഞ്ഞു. മാനദണ്ഡം പാലിക്കാതെ അറുപതോളം യാത്രക്കാരുമായെത്തിയ സ്വകാര്യബസ് കൊച്ചിയില്‍ പൊലീസ് കസ്റ്റഡിയിലെടുത്തു. കോഴിക്കോട്ട് സിറ്റി സര്‍വീസുകളടക്കം നിര്‍ത്തിച്ചത് യാത്രാക്ലേശം രൂക്ഷമാക്കി.

കോവിഡ് മാനദണ്ഡങ്ങള്‍ ഒരു വശത്ത്. നിരത്തിലെ തിരക്ക് മറുവശത്ത് . വല്ലപ്പോഴുമെത്തുന്ന ബസുകളില്‍ എങ്ങിനെയും കയറിപ്പറ്റാനാണ് യാത്രക്കാരുടെ ശ്രമം. അവിടെ ബസ് ജീവനക്കാര്‍ വിലക്കിയാലും യാത്രക്കാര്‍ ഇടിച്ചുകയറുന്ന സ്ഥിതിയാണ്. 60യാത്രക്കാരുമായാണ് ആലുവ ഫോര്‍ട്ട് കൊച്ചി റൂട്ടിലോടുന്ന സ്വകാര്യബസ് ഇന്ന് സര്‍വീസ് നടത്തിയത് . പാലാരിവട്ടത്ത് വച്ച് ബസ് പൊലീസ് പിടികൂടി. യാത്രക്കാരെ ഇറക്കി സര്‍വീസ് അവസാനിപ്പിക്കുകയും ചെയ്തു. നഗരത്തില്‍ മറ്റ് റൂട്ടുകളിലും സ്ഥിതി വിഭിന്നമല്ല.

കടുത്ത നഷ്ടത്തില്‍ സര്‍വീസ് നടത്തുന്ന ബസുകള്‍ നിര്‍ത്തിവയ്ക്കേണ്ട സ്ഥിതിയലാണെന്നാണ് ഉടമകളുടെ നിലപാട് . കോഴിക്കോട്ടാകട്ടെ. വിരലിലെണ്ണാവുന്ന യാത്രക്കാരുമായാണ് ജില്ലകള്‍ കടന്നുള്ള മിക്ക ബസുകളുെടയും സഞ്ചാരം. ഈ രീതിയില്‍ സര്‍വീസ് തുടരാനാകില്ലെന്നാണ് ചൂണ്ടിക്കാട്ടിയാണ് പലബസുകളും സര്‍വീസ് നിര്‍ത്തിയത്. എറ്റവുമധികം സ്വകാര്യബസുകളുള്ള കോഴിക്കോട് മുക്കം റൂട്ടില്‍ പത്തില്‍ താഴെ ബസുകള്‍ മാത്രമാണ് നിരത്തിലുള്ളത് .സിറ്റിസര്‍വീസുകള്‍ ഭൂരിഭാഗവും നഷ്ടം ഭയന്ന് സര്‍വീസ് നിര്‍ത്തിവച്ചിരിക്കുകയാണ്.