സര്ക്കാര് ക്വാറന്റീന് ഉപേക്ഷിച്ചിട്ടില്ല, കേരളത്തില് ഫലപ്രദം ഹോം ക്വാറന്റീന്; ആന്റിബോഡി പരിശോധന ഇന്ന് മുതല്; ആരോഗ്യമന്ത്രി
തിരുവനന്തപുരം: കേരളം ഇന്സ്റ്റിറ്റിയൂഷണല് ക്വാറന്റീന് ഉപേക്ഷിച്ചിട്ടില്ലെന്നും വീട്ടില് സൗകര്യള്ള എല്ലാവരേയും ഹോം ക്വാറന്റീന് ചെയ്യാനാണ് ഉദ്ദേശിച്ചിരിക്കുന്നതെന്നും ആരോഗ്യമന്ത്രി കെ.കെ.ശൈലജ. കേരളത്തില് ഏറ്റവും ഫലപ്രദമെന്ന് തെളിയിക്കപ്പെട്ടത് ഹോം ക്വാറന്റീനാണെന്നും മന്ത്രി പറഞ്ഞു.മാസ്ക് ധരിക്കലടക്കമുള്ള കാര്യങ്ങള് കൃത്യമായി തന്നെ പാലിക്കണം. ഇതൊന്നും വെറുതെ പറയുന്നതല്ല. മാസ്ക് വെറുതെ കഴുത്തില് കെട്ടിവയ്ക്കരുത്. റാപ്പിഡ് ആന്റിബോഡി പരിശോധന ഇന്ന് മുതല് തുടങ്ങും. സമൂഹവ്യാപനം ഉണ്ടോ എന്നറിയാനാണ് ആന്റിബോഡി പരിശോധന.
ആന്റീ ബോഡി ടെസ്റ്റ് നെഗറ്റീവായാലും ക്വാറന്റൈന് വ്യവസ്ഥ നിര്ബന്ധമായും പാലിക്കണം.കേരളത്തില് പ്രധാനമായും ഹോ ക്വാറന്റൈനാണുള്ളത്. എന്നാല് ഹോം ക്വാറന്റൈന് വിജയിക്കണമെങ്കില് വലിയ ബോധവത്കരണം വേണം. കൃത്യമായി എല്ലാ സൗകര്യവും ഉണ്ടോ എന്ന് ബന്ധപ്പെട്ടവര് പരിശോധിക്കുന്നുണ്ട്. എന്നാല് ഹോം ക്വാറന്റൈന് സൗകര്യമില്ലാത്തവരെ ഇന്സ്റ്റിറ്റിയൂഷന് ക്വാറന്റൈനിലേക്കയക്കും.
സംസ്ഥാനത്ത് കൊവിഡ് രോഗികളുടെ എണ്ണം വര്ദ്ധിക്കുമെന്ന് പ്രതീക്ഷിച്ചത് തന്നെയാണ്.പ്രതീക്ഷിച്ചതിനേക്കാള് കൂടുതല് രോഗ വ്യാപന നിരക്ക് ഉയരുന്ന സാഹചര്യം ഇതുവരെ ഇല്ല.സംസ്ഥാനത്ത് പത്ത് ശതമാനം പേര്ക്കാണ് സമ്പര്ക്കത്തിലൂടെ രോഗം സ്ഥിരികരിച്ചത്. അത് നിയന്ത്രിക്കാന് സാധിച്ചാല് കൊവിഡ് നിരക്ക് കുറയ്ക്കാന് സാധിക്കും.അതിന് സര്ക്കാര് നിര്ദ്ദേശങ്ങള് കൃത്യമായി പാലിക്കണമെന്നും ആരോഗ്യ മന്ത്രി പറഞ്ഞു.