ക്രിക്കറ്റ് കളിക്കിടെ ബാറ്റുകൊണ്ട് അടിയേറ്റ് വിദ്യാര്‍ത്ഥി മരിച്ചു

News Desk

22 November 2019 04:28 PM

മാവേലിക്കര: സ്‌കൂളില്‍ ക്രിക്കറ്റ് കളിക്കുന്നതിനിടെ അബദ്ധത്തില്‍ അടിയേറ്റ് വിദ്യാര്‍ത്ഥി മരിച്ചു. മാവേലിക്കര ചുനക്കര ജിവിഎച്ച്‌എസ്‌എസിലെ ആറാം ക്ലാസ് വിദ്യാര്‍ത്ഥി ചാരുമൂട് പുതുപ്പള്ളിക്കുന്ന വിനോദ് ഭവനില്‍ നവനീത് (12) ആണ് മരിച്ചത്. സ്‌കൂളില്‍ ഉച്ചഭക്ഷണത്തിന്റെ ഇടവേളയിലാണ് സംഭവം. ഇതേ സ്‌കൂളിലെ കുട്ടികള്‍ തന്നെ ക്രിക്കറ്റ് കളിക്കുന്നതിനിടെ സ്ഥലത്തേക്ക് ഓടിയെത്തിയതായിരുന്നു നവനീത്. ഈ സമയം മറ്റൊരു വിദ്യാര്‍ത്ഥി ബാറ്റ് വീശുമ്പോൾ നവനീതിന്റെ കഴുത്തിനു പിന്നില്‍ തലയ്ക്ക് പിറകിലായി അടികൊള്ളുകയായിരുന്നു. ഉടന്‍തന്നെ നവനീത് സ്ഥലത്ത് ബോധരഹിതനായി വീണു. കുട്ടിയെ ഉടന്‍ തന്നെ സമീപത്തുള്ള സര്‍ക്കാര്‍ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. മൃതദേഹം കായംകുളം താലൂക്ക് ആശുപത്രിയിലേക്ക് മാറ്റി.

എട്ടാം ക്ലാസിലേയും ആറാം ക്ലാസിലേയും മൂന്നു കുട്ടികളാണ് ഈ സമയം ക്രിക്കറ്റ് കളിച്ചുകൊണ്ടിരുന്നത്. ഇവരുടെ അടുത്തേക്ക് നവനീത് ഓടി എത്തുന്നതിനിടെയാണ് അപകടം. സ്ഥലത്തുണ്ടായിരുന്ന കുട്ടികളില്‍ നിന്ന് പോലീസ് മൊഴിയെടുക്കുകയാണ്. കുട്ടികള്‍ക്കിടയില്‍ മറ്റു പ്രശ്‌നമൊന്നുമില്ലെന്നും അബദ്ധത്തിലാണ് അപകടം സംഭവിച്ചതെന്നും സ്‌കൂള്‍ അധികൃതര്‍ പറയുന്നു.

ഭക്ഷണം കഴിച്ചതിനു ശേഷം കൈ കഴുകാന്‍ പൈപ്പിന് സമീപത്തേക്ക് നടക്കുന്നതിനിടെ ക്രിക്കറ്റ് കളിക്കുന്ന കുട്ടിയുടെ കയ്യില്‍ നിന്ന് തെറിച്ചുപോയ ബാറ്റാണ് കൊണ്ടതെന്നും റിപ്പോര്‍ട്ടുണ്ട്. സ്‌കൂളില്‍ പിടിഎ യോഗം ചേരുന്നതിനാല്‍ രക്ഷിതാക്കളും പിടിഎ ഭാരവാഹികളും അടക്കം നിരവധി പേര്‍ സ്ഥലത്തുണ്ടായിരുന്നു.