ഗണേഷ് കുമാറിന്റെ വാഹനത്തിന് നേരെ കല്ലേറ്; 5 യൂത്ത് കോണ്ഗ്രസ് പ്രവര്ത്തകര് കസ്റ്റഡിയില്
ചവറ: ചവറ ദേശീയപാതയില് കെ.ബി. ഗണേഷ്കുമാറിന്റെ കാറിന് നേരെ യൂത്ത് കോണ്ഗ്രസ് പ്രവര്ത്തകര് കരിങ്കൊടി കാണിച്ചതിനെ തുടര്ന്ന് സംഘര്ഷം. കാര് പ്രവര്ത്തകര് അടിച്ചു തകര്ത്തു. ഗണേഷ് കുമാറിന്റെ മുന് പി.എ പ്രദീപ് കുമാര് കഴിഞ്ഞ ദിവസം കോണ്ഗ്രസ് പ്രവര്ത്തകരെ ആക്രമിച്ചിരുന്നു. ഇതില് പ്രതിഷേധിച്ചായിരുന്നു കരിങ്കൊടി കാണിച്ചതെന്നാണ് കരുതുന്നത്. തുടര്ന്ന് സംഘര്ഷമുണ്ടാകുകയായിരുന്നു.
കഴിഞ്ഞ വെള്ളിയാഴ്ച കോക്കാട്ട് ക്ഷീരോല്പാദക സംഘം കെട്ടിടത്തിന്റെ ഉദ്ഘാടന വേദിക്കു സമീപം എംഎല്എയെ കരിങ്കൊടി കാണിച്ച യൂത്ത് കോണ്ഗ്രസ് പ്രവര്ത്തകരെയും പ്രദീപിന്റെ നേതൃത്വത്തിലുള്ള സംഘം ആക്രമിച്ചിരുന്നു. കരിങ്കൊടി കാണിച്ചതിനെ തുടര്ന്നുള്ള സംഘര്ഷ സ്ഥലത്തും പ്രദീപ് കുമാര് ഉണ്ടായിരുന്നു.
സംഭവത്തില് 5 യൂത്ത് കോണ്ഗ്രസ് പ്രവര്ത്തകരെ കസ്റ്റഡിയിലെടുത്തു. നടിയെ ആക്രമിച്ച കേസിലെ സാക്ഷിയെ ഭീഷണിപ്പെടുത്തിയതിന് അറസ്റ്റിലായ ശേഷം ജാമ്യത്തിലിറങ്ങിയ പ്രദീപ് കോട്ടാത്തല ഉള്പ്പെടെയുള്ളവര്ക്കെതിരെ ആദ്യ സംഭവത്തില് കുന്നിക്കോട് പൊലീസ് കേസെടുത്തിരുന്നു.
സംഘര്ഷത്തെ പിന്തുണക്കില്ലെന്നും എന്നാല്, ഗണേഷ്കുമാറിന്റെ നേതൃത്വത്തില് മേഖലയില് അക്രമം അഴിച്ചുവിടുകയാണെന്നും ഡി.സി.സി. പ്രസിഡന്റ് ബിന്ദുകൃഷ്ണ പറഞ്ഞു.