അതിര്‍ത്തിയില്‍ ചൈനീസ് സൈനികരുടെ കേന്ദ്രീകരണം, ഇന്ത്യയ്ക്ക് സുരക്ഷാ വെല്ലുവിളിയെന്ന് എസ്.ജയശങ്കര്‍

News Desk

16 October 2020 10:12 PM

ന്യൂഡല്‍ഹി: ലഡാക്ക് അതിര്‍ത്തിയില്‍ ചൈനീസ് സൈനികരുടെ കേന്ദ്രീകരണം ഇന്ത്യയ്ക്ക് നിര്‍ണായക സുരക്ഷാ വെല്ലുവിളി ഉയര്‍ത്തുന്നുവെന്ന് വിദേശകാര്യ മന്ത്രി എസ്.ജയശങ്കര്‍. 30 വര്‍ഷമായി ഇരു രാജ്യങ്ങളും കെട്ടിപ്പെടുത്തിയ വിശ്വസത്തെ ഇത് ബാധിക്കുമെന്നും ജയശങ്കര്‍ പറഞ്ഞു.മുന്‍ ഓസ്‌ട്രേലിയന്‍ പ്രധാനമന്ത്രി കെവിന്‍ റൂഡിനൊപ്പം ഏഷ്യാ സൊസൈറ്റിക്ക് വേണ്ടി ഇന്ത്യ നേരിടുന്ന ആഗോള വെല്ലുവിളികളെക്കുറിച്ചുള്ള ചര്‍ച്ചയില്‍ പങ്കെടുത്തു സംസാരിക്കുകയായിരുന്നു അദ്ദേഹം.

അതിര്‍ത്തിയിലെ സാഹചര്യം ആഴത്തില്‍ പൊതു ജനങ്ങള്‍ക്കിടയിലും രാഷ്‌ട്രീയ പരമായും ചര്‍ച്ചചെയ്യപ്പെടുമെന്നും ഇത് ഇരു രാജ്യങ്ങള്‍ തമ്മിലുള്ള ബന്ധത്തെ കൂടുതല്‍ മോശമായി ബാധിക്കുമെന്നും ജയശങ്കര്‍ കൂട്ടിച്ചേര്‍ത്തു. ജൂണ്‍ 15ന് അതിര്‍ത്തിയില്‍ ചെെനീസ് സെെന്ന്യവും ഇന്ത്യന്‍ സെെന്യവും തമ്മിലേറ്റുമുട്ടുകയും 20 ഇന്ത്യന്‍ സെെനികര്‍ വീരമൃത്യൂവരിച്ച സംഭവം ചൂണ്ടിക്കാട്ടിയുമാണ് അദ്ദേഹം ഇക്കാര്യം പറഞ്ഞത്.

"തര്‍ക്ക അതിര്‍ത്തിയില്‍ ചൈനീസ് സൈനികരുടെ കേന്ദ്രീകരണം ഒരു നിര്‍ണായക സുരക്ഷാ വെല്ലുവിളിയാണ്. എന്നാല്‍ എനിക്ക് ഇക്കാര്യത്തില്‍ ന്യായമായ ഒരു വിശദീകരണം ലഭിച്ചിട്ടില്ല." എസ്.ജയശങ്കര്‍ പറഞ്ഞു.

പ്രധാനമന്ത്രി നരേന്ദ്ര മോദിയും പ്രസിഡന്റ് ഷി ജിന്‍പിംഗും തമ്മിലുള്ള അനൗപചാരിക ഉച്ചകോടികള്‍ 2018 ല്‍ വുഹാനിലും 2019 ല്‍ മമല്ലപുരത്തും നടന്നിരുന്നു. ഇത് രണ്ട് നേതാക്കള്‍ക്കും സമയം ചെലവഴിക്കാനും പരസ്പരം അവരുടെ ആശങ്കകളറിയിച്ച്‌ തുറന്ന് സംസാരിക്കാനും അവസരമൊരുക്കിയിരുന്നുവെന്നും ജയശങ്കര്‍ പറഞ്ഞു. അതേസമയം അതിര്‍ത്തിയിലെ സംഘര്‍ഷ സാദ്ധ്യത കണക്കിലെടുത്ത് കൂടുതല്‍ സേനയെ വിന്യസിച്ചിരിക്കുകയാണ്.