യുഎസില് കൊറോണ സ്ഥിരീകരിച്ച രോഗിയെ ചികിത്സിക്കുന്നത് റോബോട്ടുകള്
വാഷിങ്ടണ്: യുഎസില് സ്ഥിരീകരിച്ച ഏക കൊറോണ വൈറസ് ബാധിതനെ ചികിത്സിക്കുന്നത് നൂതന സാങ്കേതിക വിദ്യയുടെ സഹായത്തോടെ. രോഗിയെ ചികിത്സിക്കാന് റോബോട്ടുകളെയാണ് പ്രധാനമായും ഉപയോഗിക്കുന്നതെന്ന് യുഎസ് സെന്റര് ഫോര് ഡിസീസ് അധികൃതര് വ്യക്തമാക്കി. സ്റ്റെതസ്കോപ്പും, ക്യാമറയും മൈക്രോഫോണും ഘടിപ്പിച്ച റോബോട്ടിനെ ഡോ. ജോര്ജ് ഡയസിന്റെ നേതൃത്വത്തിലാണ് ചികിത്സയ്ക്കായി ഉപയോഗിക്കുന്നത്.
വൈറസ് അനിയന്ത്രിതമായി പടരുന്ന പശ്ചാത്തലത്തിലാണ് റോബോട്ടുകളെ ചികിത്സയ്ക്ക് ഉപയോഗിക്കുന്നതെന്നാണ് അധികൃതരുടെ വിശദീകരണം. മുപ്പതുകാരനായ രോഗി വാഷിങ്ടണിലെ എവറെറ്റിലെ ആശുപത്രിയിലാണ് ചികിത്സയിലുള്ളത്.
ഐസൊലേഷനില് കഴിയുന്ന രോഗിയുടെ നില തൃപ്തികരമാണ്. അതീവസുരക്ഷയ്ക്കായി ഐസോപ്പോഡ് സംവിധാനത്തിലാണ് ചികിത്സ. ശരീരം മുഴുവന് മൂടുന്ന തരത്തിലുള്ള അതീവ സുരക്ഷാവസ്ത്രങ്ങളും ഹെല്മെറ്റും ധരിച്ച സുരക്ഷാജീവനക്കാര് ഐസോലേഷന് റൂമില് കാവല് നില്ക്കുന്നുണ്ട്.
കഴിഞ്ഞ തിങ്കളാഴ്ചയാണ് കൊറോണ വൈറസ് സ്ഥിരീകരിച്ചതിനെ തുടര്ന്ന് ഇയാളെ ആശുപത്രിയില് പ്രവേശിപ്പിച്ചത്. ചൈന സന്ദര്ശനത്തിനുശേഷം അമേരിക്കയിലേക്ക് മടങ്ങിയെത്തിയ ഇയാള് രോഗലക്ഷണങ്ങള് പ്രകടിപ്പിച്ചതിനെ തുടര്ന്ന് പരിശോധന നടത്തുകയായിരുന്നു.