കടലിലെ അപകടങ്ങളിലും രക്ഷ; മറൈന് ആംബുലന്സുകള് റെഡി
എറണാകുളം: ഇനി കടലില് ഉണ്ടാകുന്ന അപകടങ്ങളില് രക്ഷാ പ്രവര്ത്തനത്തിന് അത്യാധുനീക മറൈന് ആംബുലന്സ് ബോട്ടുകള് ലഭ്യമാകും . കേരള തീരത്തെ മൂന്ന് മേഖലകള് ആയ തിരുവനന്തപുരം, എറണാകുളം, കോഴിക്കോട് എന്നി സ്ഥലങ്ങള് കേന്ദ്രീകരിച്ചായിരിക്കും മറൈന് ആംബുലന്സിന്റെ പ്രവര്ത്തനം. ആംബുലന്സുകളുടെ പ്രവര്ത്തന ഉത്ഘാടനം ഇന്ന് മുഖ്യമന്ത്രി പിണറായി വിജയന് വീഡിയോ കോണ്ഫെറെന്സിലൂടെ നിര്വഹിക്കും.
അപകടത്തില് പെടുന്നവര്ക്ക് ദുരന്ത മുഖത്ത് വെച്ചു തന്നെ പ്രാഥമിക ചികിത്സ നല്കിയ ശേഷം അതിവേഗം കരയിലെത്തിക്കാന് മറൈന് ആംബുലന്സുകള് സഹായിക്കും. ഈ ആംബുലന്സുകളില് 10 പേരെ വരെ ഒരേ സമയം കിടത്തി ചികില്സിക്കാന് സാധിക്കും. പ്രാഥമിക ചികിത്സക്ക് ആവശ്യമായ മെഡിക്കല് ഉപകരണങ്ങള്, മരുന്നുകള്, പാരാ മെഡിക്കല് സ്റ്റാഫിന്റെ സേവനം, പ്രത്യേക പരിശീലനം ലഭിച്ച നാല് സീ റെസ്ക്യൂ സ്റ്റാഫിന്റെ സേവനം, മോര്ച്ചറി എന്നിവയും ഒരുക്കിയിട്ടുണ്ട്.
കേരള ഷിപ്പിംഗ് ആന്ഡ് ഇന്ലാന്റ് നാവിഗേഷന് കോര്പറേഷന് ആണ് സാങ്കേതിക ജീവനക്കാരെ നിയമിക്കുന്നത്. ഒരു ബോട്ടിന് 6.08 കോടി വീതം 18.24 കോടിയാണ് പദ്ധതിയുടെ അടങ്കല് തുക. ഓഖി പുനരധിവാസ പാക്കേജില് ഉള്പ്പെടുത്തി മുഖ്യമന്ത്രിയുടെ ദുരിതാശ്വാസ നിധിയില് നിന്നും 7.36 കോടി രൂപയും ഫിഷറീസ് വകുപ്പിന്റെ പ്ലാന് ഫണ്ടില് നിന്നും രണ്ട് കോടി രൂപയും സര്ക്കാര് നല്കി. ഒരു ബോട്ടിന്റെ പൂര്ണമായ നിര്മ്മാണ ചെലവ് ബി.പി.സി.എലും ഒരു ബോട്ടിന്റെ പകുതി നിര്മാണ ചെലവ് കൊച്ചിന് ഷിപ് യാര്ഡും അവരുടെ സാമൂഹിക പ്രതിബദ്ധത ഫണ്ടില് നിന്നും അനുവദിച്ചിരുന്നു.