നാല് വാക്സിനുകള്‍ക്ക് കൂടി അനുമതി നല്‍കുന്നത് പരിഗണനയില്‍

News Desk

12 January 2021 08:10 PM

ന്യൂഡല്‍ഹി: നാല് കോവിഡ് വാക്സിനുകള്‍ക്ക് കൂടി രാജ്യത്ത് അനുമതി നല്‍കുന്നത് പരിഗണനയിലാണെന്ന് കേന്ദ്ര ആരോഗ്യ സെക്രട്ടറി രാജേഷ് ഭൂഷണ്‍ പറഞ്ഞു. സിഡസ് കാഡില, റഷ്യയുടെ സ്പുട്നിക് വി, ജെനോവ, ബയോളജിക്കല്‍ ഇ എന്നിവക്ക് അനുമതി നല്‍കുന്ന കാര്യം പരിശോധിച്ചുവരികയാണെന്ന് ചൊവ്വാഴ്ച വാര്‍ത്താസമ്മേളനത്തില്‍ അദ്ദേഹം വ്യക്തമാക്കി.

രാജ്യത്ത് അടിയന്തര ഉപയോഗത്തിന് ഡ്രഗ് കണ്‍ട്രോളര്‍ ജനറല്‍ ഓഫ് ഇന്ത്യ അനുമതി നല്‍കിയ ഒാക്സ്ഫോര്‍ഡ് ആസ്ട്ര സെനക വാക്സിന്‍ 'കോവീഷീല്‍ഡ്' 200 രൂപക്കും തദ്ദേശീയ വാക്സിനായ 'കോവാക്സിന്‍' 206 രൂപക്കുമാണ് നിര്‍മാതാക്കളില്‍ നിന്നും സര്‍ക്കാര്‍ സംഭരിക്കുന്നതെന്ന് രാജേഷ് ഭൂഷണ്‍ പറഞ്ഞു.

സിറം ഇന്‍സ്റ്റിറ്റ്യൂട്ടില്‍ നിന്നും കോവീഷീല്‍ഡ് ഒരു കോടി 10 ലക്ഷം ഡോസും ഭാരത് ബയോടെക്കില്‍ നിന്നും കോവാക്സിന്‍ 38.5 ലക്ഷം ഡോസുകളുമാണ് സര്‍ക്കാര്‍ ഓര്‍ഡര്‍ ചെയ്തത്. കൂടാതെ, 16.5 ലക്ഷം വാക്സിന്‍ ഭാരത് ബയോടെക് സര്‍ക്കാറിന് സൗജന്യമായി നല്‍കും.

28 ദിവസത്തിനുള്ളില്‍ രണ്ട് ഡോസ് വാക്‌സിന്‍ ആണ് എടുക്കേണ്ടത്. ആദ്യ ഡോസ് സ്വീകരിച്ച ശേഷം 14 ദിവസത്തിന് ശേഷം രണ്ടാമത്തെ ഡോസ് കൂടി സ്വീകരിച്ചാലേ വാക്‌സിന്‍ ഫലപ്രദമായി പ്രവര്‍ത്തിക്കൂ. സംസ്ഥാനങ്ങള്‍ക്കോ വ്യക്തികള്‍ക്കോ ഏത് വാക്സിന്‍ വേണമെന്ന് തീരുമാനിക്കാനാകില്ല. മറ്റേതൊരു രാജ്യത്തും ഇത് സാധ്യമല്ല.

രാജ്യത്ത് ആകെ 2,16,558 രോഗികളാണ് നിലവിലുള്ളത്. ഇതില്‍ കേരളത്തിലും മഹാരാഷ്ട്രയിലും മാത്രമാണ് 50,000ത്തിനു മുകളില്‍ രോഗികളുള്ളതെന്നും അദ്ദേഹം വ്യക്തമാക്കി. ജനുവരി 16നാണ് രാജ്യത്ത് ഒന്നാംഘട്ട വാക്സിന്‍ വിതരണം ആരംഭിക്കുന്നത്. സര്‍ക്കാര്‍ സ്വകാര്യ മേഖലയിലെ ഒരുകോടി ആരോഗ പ്രവര്‍ത്തകര്‍ക്കും രണ്ടുകോടി കോവിഡ് മുന്‍നിര പ്രവര്‍ത്തകര്‍ക്കുമാണ് ആദ്യഘട്ട വാക്സിന്‍ നല്‍കുക.