വെള്ളാപ്പള്ളിയെപ്പോലുള്ളവര് ശ്രദ്ധിക്കേണ്ടത് നല്ലതിന്റെ കൂടെ നില്ക്കാന്; വിസി നിയമന വിവാദത്തില് മറുപടിയുമായി മുഖ്യമന്ത്രി
തിരുവനന്തപുരം: ശ്രീനാരായണഗുരു ഓപ്പണ് സര്വകലാശാല വിസി നിയമനവുമായി ബന്ധപ്പെട്ട വിവാദത്തില് മറുപടിയുമായി മുഖ്യമന്ത്രി പിണറായി വിജയന്. നിയമനം നടത്തിയ അക്കാദമിക് മികവ്, ഭരണ മികവ് എന്നിവ പരിഗണിച്ചാണെന്ന് മുഖ്യമന്ത്രി വ്യക്തമാക്കി. ഓപ്പണ് സര്വകലാശാലക്ക് ശ്രീനാരായണ ഗുരുവിന്റെ പേര് നല്കിയത് യാദൃച്ഛിക തീരുമാനമല്ല. വിദ്യാഭ്യാസത്തിന് ഉയര്ന്ന പരിഗണന നല്കിയ നവോത്ഥാന നായകനാണ് ശ്രീനാരായണ ഗുരു. സര്ക്കാര് തലത്തില് ഗുരുവിന് ആദരം അര്പ്പിക്കണം എന്ന ആലോചനയെ തുടര്ന്നാണ് ഓപ്പണ് യൂണിവേഴ്സിറ്റിക്ക് ഗുരുവിന്റെ പേര് നല്കിയത്.
സാധാരണ യൂണിവേഴ്സിറ്റി പോലെയാകും പ്രവര്ത്തനമെന്നും അക്കാദമിക് വിദഗ്ധരാകും അവിടെ നിയമിക്കപ്പെടുകയെന്നും മുഖ്യമന്ത്രി പറഞ്ഞു. ഗുരുവിന്റെ പേര് നല്കിയപ്പോള് എല്ലാവരും അംഗീകരിച്ചു. വെള്ളാപ്പള്ളിയെപ്പോലുള്ളവര് നല്ലതിന്റെ കൂടെ നില്ക്കാനാണ് ശ്രദ്ധിക്കേണ്ടതെന്നും മുഖ്യമന്ത്രി വ്യക്തമാക്കി.