ആദ്യ അങ്കത്തില് ന്യൂസിലാന്ഡിന് ജയം
ഹാമില്ട്ടണ്: ഇന്ത്യക്കെതിരായ ഒന്നാം ഏകദിനത്തില് ന്യൂസിലാന്ഡിന് നാല് വിക്കറ്റ് ജയം. പുറത്താകാതെ 102 റണ്സെടുത്ത റോസ് ടെയ്ലറിന്െറ സെഞ്ച്വറിയാണ് ന്യൂസിലന്ഡിന് കരുത്തായത്. ഹെന്റി നിക്കോളാസ്(78) ക്യാപ്റ്റന് ലാതം(69) തുടങ്ങിയവരുടെ അര്ധസെഞ്ച്വറികളും ന്യൂസിലാന്ഡിന് കരുത്തായി. ഒരു ഘട്ടത്തില് വിക്കറ്റുകള് വീണ് ന്യൂസിലന്ഡ് പ്രതിസന്ധിയിലായെങ്കിലും ടെയ്ലറും ലാതവും ജയത്തിലേക്കുള്ള വഞ്ചി തുഴഞ്ഞു. കുല്ദീപ് യാദവാണ് ഇന്ത്യന് ബൗളര്മാരില് ഏറ്റവും കൂടുതല് റണ് വഴങ്ങിയത്.
നേരത്തെ ശ്രേയസ് അയ്യരുടെ സെഞ്ച്വറിയുടെ കരുത്തിലാണ് ഇന്ത്യ നാല് വിക്കറ്റ് നഷ്ടത്തില് 347 റണ്സ് അടിച്ചെടുത്തത്. ഒരു സിക്സും 11 ബൗണ്ടറികളുമുള്പ്പെടെ 102 പന്തിലാണ് ശ്രേയസ് അയ്യര് സെഞ്ച്വറി നേടിയത്.88 റണ്സോടെ കെ.എല് രാഹുലും 51 റണ്സോടെ ക്യാപ്റ്റന് വിരാട് കോഹ്ലിയും ഇന്ത്യന് ഇന്നിങ്സിന് കരുത്ത് പകര്ന്നു. രണ്ട് വിക്കറ്റെടുത്ത ടിം സൗത്തിയാണ് ന്യൂസിലാന്ഡ് ബൗളര്മാരില് ഭേദപ്പെട്ട പ്രകടനം കാഴ്ചവെച്ചത്. ടോസ് നേടിയ ന്യൂസിലന്ഡ് ഇന്ത്യയെ ബാറ്റിങ്ങിന് അയക്കുകയായിരുന്നു.
54 റണ്സെടുക്കുന്നതിനിടെ ഓപ്പണര്മാര് മടങ്ങിയത് ഇന്ത്യയെ ചെറുതായി സമ്മര്ദ്ദത്തിലാക്കിയെങ്കിലും വിരാട് കോഹ്ലിയും ശ്രേയസ് അയ്യരും ഒന്നിച്ചതോടെ ഇന്ത്യന് സ്കോര്ബോര്ഡ് ചലിച്ച് തുടങ്ങി.