എസ്.എ.ടി. ആശുപത്രിയില്‍ നിയോനേറ്റല്‍ ആന്റ് പീഡിയാട്രിക് കാര്‍ഡിയാക് സര്‍ജറി യൂണിറ്റ്
കുഞ്ഞ് ഹൃദയങ്ങളെ സംരക്ഷിച്ചെടുക്കാന്‍ മെഡിക്കല്‍ കോളേജില്‍ തീവ്ര പദ്ധതി
തിരുവനന്തപുരം: തിരുവനന്തപുരം മെഡിക്കല്‍ കോളേജ് എസ്.എ.ടി. ആശുപത്രിയില്‍ പീഡിയാട്രിക് കാര്‍ഡിയോളജി വിഭാഗത്തിന് കീഴില്‍ നിയോനേറ്റല്‍ ആന്റ് പീഡിയാട്രിക് കാര്‍ഡിയാക് സര്‍ജറി യൂണിറ്റ് ആരംഭിക്കുന്നതിന്റെ ഭാഗമായി 6 പുതിയ തസ്തികകള്‍ സൃഷ്ടിക്കാന്‍ മന്ത്രിസഭായോഗം അനുമതി നല്‍കിയതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. അസോസിയേറ്റ് പ്രൊഫസര്‍ ഇന്‍ പീഡിയാട്രിക് കാര്‍ഡിയാക് സര്‍ജറി, അസിസ്റ്റന്റ് പ്രൊഫസര്‍ ഇന്‍ പീഡിയാട്രിക് കാര്‍ഡിയാക് സര്‍ജറി, അസിസ്റ്റന്റ് പ്രൊഫസര്‍ ഇന്‍ കാര്‍ഡിയാക് അനസ്‌തേഷ്യ, പെര്‍ഫ്യൂഷനിസ്റ്റ് എന്നിങ്ങനെ ഓരോ തസ്തിക വീതവും സ്റ്റാഫ് നഴ്‌സ് ഗ്രേഡ് രണ്ടിന്റെ 2 തസ്തികകളുമാണ് സൃഷ്ടിച്ചത്.
ഇതുകൂടാതെ എസ്.എ.ടി ആശുപത്രിയിലെ ശിശുരോഗ വിഭാഗത്തില്‍ നിന്നും പുനര്‍വിന്യാസം വഴി ഫിസിയോതെറാപിസ്റ്റ് 1, സ്റ്റാഫ് നഴ്‌സ് ഗ്രേഡ് രണ്ട് 3, അസിസ്റ്റന്റ് പ്രൊഫസര്‍ കാര്‍ഡിയാക് അനസ്‌തേഷ്യ 1, അസിസ്റ്റന്റ് പ്രൊഫസര്‍ അനസ്‌തേഷ്യ 2 എന്നീ തസ്തികകള്‍ മെഡിക്കല്‍ വിദ്യാഭ്യാസ ഡയറക്ടര്‍ കണ്ടെത്തുന്നതാണ്.
സംസ്ഥാനത്ത് ഓരോ വര്‍ഷവും ജനിക്കുന്ന 5 ലക്ഷം കുട്ടികളില്‍ 4,000 പേര്‍ ജന്മനായുള്ള ഹൃദ്രോഗ ബാധിതരാണ്. ഇവരില്‍ ഏകദേശം 2,000 നവജാത ശിശുക്കള്‍ക്കും കുട്ടികള്‍ക്കും കാര്യമായ രീതിയില്‍ രോഗമുള്ളതിനാല്‍ ഇവര്‍ക്ക് ഹൃദയം തുറന്നുള്ള ശസ്ത്രക്രിയ ആവശ്യമാണ്. നിലവില്‍ തിരുവനന്തപുരത്തെ ശ്രീചിത്ര ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസില്‍ മാത്രമാണ് ഇത്തരം ശസ്ത്രക്രിയകള്‍ നടത്തുന്നത്. ഈ സാഹചര്യത്തിലാണ് തിരുവനന്തപുരം എസ്.എ.ടി. ആശുപത്രിയിലെ പീഡിയാട്രിക് കാര്‍ഡിയോളജി വിഭാഗത്തിന് കീഴില്‍ നിയോനേറ്റല്‍ ആന്റ് പീഡിയാട്രിക് കാര്‍ഡിയാക് സര്‍ജറി യൂണിറ്റ് സ്ഥാപിക്കാന്‍ സര്‍ക്കാര്‍ തീരുമാനിച്ചതെന്ന് മന്ത്രി കെ.കെ. ശൈലജ ടീച്ചര്‍ വ്യക്തമാക്കി. ഇതിന് മുന്നോടിയായി കാര്‍ഡിയോളജി വിഭാഗം ശക്തിപ്പെടുത്താന്‍ 13 തസ്തികകള്‍ ഈ സര്‍ക്കാരിന്റെ കാലത്ത് അനുവദിച്ചിരുന്നു. 2007ല്‍ പീഡിയാട്രിക് കാര്‍ഡിയോളജി വിഭാഗം സ്ഥാപിച്ചെങ്കിലും ഇത്രയും വര്‍ഷമായിട്ടും ഒരു പ്രൊഫസറും അസിസ്റ്റന്റ് പ്രൊഫസറും മാത്രമാണുണ്ടായിരുന്നത്. അതില്‍ പ്രൊഫസര്‍ വിരമിക്കുകയും ചെയ്തു. ജീവനക്കാരുടെ അഭാവം ചികിത്സിയ്‌ക്കെത്തുന്ന കുഞ്ഞുങ്ങളെ കാര്യമായി ബാധിക്കുന്നുണ്ടെന്ന കണ്ടെത്തലിനെത്തുടര്‍ന്നാണ് പീഡിയാട്രിക് കാര്‍ഡിയോളജി വിഭാഗത്തില്‍ പുതുതായി 13 തസ്തികകള്‍ സൃഷ്ടിച്ചത്. കുട്ടികളുടെ ഹൃദയസംബന്ധമായ രോഗങ്ങള്‍ ചികിത്സിക്കാനായി 6 കോടി രൂപയുടെ കാത്ത് ലാബ് സ്ഥാപിച്ചു. കൃത്യമായ ഹൃരോഗ നിര്‍ണയത്തിനായി 82 ലക്ഷം മുടക്കി എക്കോ കാര്‍ഡിയോഗ്രാഫി മെഷീനും നേരത്തെ സ്ഥാപിച്ചിരുന്നു. ഗര്‍ഭസ്ഥ ശിശുവിന്റെ ഹൃദ്രോഗം നിര്‍ണയിക്കാന്‍ പോലും ഇതിലൂടെ കഴിയുന്നു. നിയോനേറ്റല്‍ ആന്റ് പീഡിയാട്രിക് കാര്‍ഡിയാക് സര്‍ജറി യൂണിറ്റ് സജ്ജമാകുന്നതോടെ കുട്ടികളുടെ ഹൃദയസംബന്ധമായ ചികിത്സാ രംഗത്ത് വലിയ മുന്നേറ്റമുണ്ടാക്കാന്‍ എസ്.എ.ടി. ആശുപത്രിക്ക് കഴിയുമെന്നും മന്ത്രി വ്യക്തമാക്കി.
Related News
കോവിഡ് ഡ്യൂട്ടിക്ക് ഹാജരാകാത്ത രണ്ട് ഡോക്ടര്മാരെ പിരിച്ചു വിട്ടു
മറ്റൊരു റെക്കോര്ഡ് കൂടി; ഒറ്റ ദിവസം കൊണ്ട് 4.96 ലക്ഷം പേര്ക്ക് വാക്സിന് നല്കി കേരളം
സിനിമാ താരം നോബിയുടെ മാതാവ് മരണപ്പെട്ടു
കണ്ണൂരില് വന് മയക്കുമരുന്ന് വേട്ട; യുവതി ഉള്പ്പെടെ നാലുപേര് പിടിയില്