നാവിക സേനയിൽ സ്‌മാർട്ട്‌ ഫോണിനും ഫേസ്‌ബുക്കിനും വിലക്ക്‌

News Desk

30 December 2019 01:14 PM

ന്യൂഡൽഹി: നാവിക സേനാംഗങ്ങൾ സ്​മാർട്ട്​ ഫോണും ഫേസ്​ബുക്കും​ ഉപയോഗിക്കുന്നതിന്​ വിലക്ക്​. നാവിക മേഖലകളിൽ സ്​മാർട്ട്​ ഫോണുകൾ ഉപയോഗിക്കരുതെന്ന്‌ ഡിസംബർ 27ന്​ പുറത്തിറക്കിയ സർക്കുലറിൽ പറയുന്നു. യുദ്ധക്കപ്പലുകളിലും സ്‌മാർട്ട്‌ ഫോണിന്‌ വിലക്കുണ്ട്‌. തന്ത്രപ്രധാന വിഷയങ്ങൾ സാമൂഹിക മാധ്യമങ്ങൾ വഴി ചോരുന്നത്​ തടയാനാണ്​ നടപടി. നാവിക താവളങ്ങൾ, നിർമാണ ശാലകൾ തുടങ്ങിയ ഇടങ്ങളിൽ സ്​മാർട്ട്​ ഫോണോ മെസേജിങ്​ ആപ്പുകൾ, നെറ്റ്​വർക്കിങ്​, ​ബ്ലോഗിങ്​ ഇ -​കൊമേഴ്​സ്​ സൈറ്റുകൾ എന്നിവ ഉപയോഗിക്കുന്നതിനും വിലക്കുണ്ട്.

ഡിസംബർ 20ന്​ ഹവാല ഇടപാടുമായി ബന്ധപ്പെട്ട്​ വിശാഖപ്പട്ടണത്തിൽ നിന്നും എട്ട്​ നാവിക ഉദ്യോഗസ്ഥർ അറസ്​റ്റിലായിരുന്നു. തുടർന്ന്​ ആന്ധ്രാപ്രദേശ്​ രഹസ്യാന്വേഷണ വിഭാഗം നാവിക രഹസ്യാന്വേഷണ ഏജൻസിയുമായും കേന്ദ്ര ഏജൻസിയുമായും സഹകരിച്ച്​ അന്വേഷണം നടത്തയപ്പോൾ പാകിസ്​ഥാനുമായി ബന്ധപ്പെട്ട ചാരപ്രവർത്തനം നടത്തുന്ന റാക്കറ്റുകൾ സജീവമാണെന്ന്​ കണ്ടെത്തി. ഇതാണ്‌ പുതിയ ഉത്തരവിറക്കാൻ കാരണം.