സോളാറില് സ്വാഭാവിക നടപടി; രാഷ്ട്രീയ ദുരുദ്ദേശം കാണേണ്ടതില്ലെന്ന് മുഖ്യമന്ത്രി
തിരുവനന്തപുരം: സോളാര് പീഡന പരാതികള് സിബിഐക്ക് വിട്ടത് സ്വാഭാവിക നടപടിയെന്ന് മുഖ്യമന്ത്രി പിണറായി വിജയന്. ഇതില് രാഷ്ട്രീയ ദുരുദ്ദേശം കാണേണ്ടതില്ലെന്നും വാര്ത്താ സമ്മേളനത്തില് മുഖ്യമന്ത്രി പറഞ്ഞു.
ഒരു കേസും സിബിഐക്ക് വിടില്ലെന്ന് സര്ക്കാരിന് നിലപാടില്ല. വാളയാര് ഉള്പ്പെടെ ചില കേസുകള് സര്ക്കാര് തന്നെ മുന്പ് സിബിഐക്ക് വിട്ടിട്ടുണ്ട്. പോലീസ് അന്വേഷണത്തില് പുരോഗതിയുണ്ടാകുന്നില്ല. കേസ് സിബിഐക്ക് വിടണമെന്ന് ഇരയായ വനിത അപേക്ഷ നല്കുകയാണ്.
ഇരയുടെ പരാതി സ്വീകരിച്ച് നടപടി എടുക്കുക എന്നതല്ലാതെ സര്ക്കാരിന് എന്താണ് ചെയ്യാനാകുക. സോളാര് കേസില് സര്ക്കാര് ഇടപെട്ട് അന്വേഷണം ത്വരിതപ്പെടുത്താന് ശ്രമിച്ചിട്ടില്ലെന്നും മുഖ്യമന്ത്രി പറഞ്ഞു.