ദേശീയ പണിമുടക്ക്; ബുധനാഴ്ച്ച നടത്താനിരുന്ന സര്‍വ്വകലാശാല പരീക്ഷകള്‍ മാറ്റിവെച്ചു

Ajith.A

07 January 2020 09:51 AM

തിരുവനന്തപുരം: ( 07.01.2020) ദേശീയ പണിമുടക്കിനെ തുടര്‍ന്ന് ബുധനാഴ്ച്ച നടത്താനിരുന്ന സര്‍വ്വകലാശാല പരീക്ഷകള്‍ മാറ്റി വെച്ചു. മഹാത്മാഗാന്ധി, കണ്ണൂര്‍ സര്‍വ്വകലാശാലകളാണ് പരീക്ഷകള്‍ മാറ്റിവെച്ചത്.

കണ്ണൂര്‍ സര്‍വ്വകലാശാലയിലെ ഏഴാം സെമസ്റ്റര്‍ ബിടെക് പരീക്ഷകള്‍ ഈ മാസം 13 നും രണ്ടാം സെമസ്റ്റര്‍ എം എസ് സി ബയോളജി/ ബയോകെമിസ്ട്രി (പാര്‍ട്ട് 2) പരീക്ഷകള്‍ 15നും എട്ടാം സെമസ്റ്റര്‍ ബിഎ എല്‍എല്‍ബി പരീക്ഷകള്‍ 16നും നടത്തുമെന്ന് അധികൃതര്‍ അറിയിച്ചു. പരീക്ഷാ കേന്ദ്രത്തിനും സമയക്രമത്തിനും മാറ്റമില്ലെന്നും അധികൃതര്‍ അറിയിച്ചു.

വിവിധ ആവശ്യങ്ങളുന്നയിച്ച്‌ ട്രേഡ് യൂണിയന്‍ സംയുക്ത സമര സമിതി നടത്തുന്ന 24 മണിക്കൂര്‍ പണിമുടക്ക് ചൊവ്വാഴ്ച്ച അര്‍ദ്ധ രാത്രി 12 മണിക്കാണ് ആരംഭിക്കുക. ബുധനാഴ്ച്ച രാത്രി 12 മണി വരെയാണ് പണിമുടക്ക്.