എന്ഐഎ പരിശോധന സി ആപ്റ്റിലും; ഉദ്യോഗസ്ഥനെ ചോദ്യം ചെയ്യാന് കൊണ്ടുപോയി
തിരുവനന്തപുരം: യുഎഇ കോണ്സുലേറ്റില് നിന്ന് എത്തിച്ച മതഗ്രന്ഥം വിതരണം ചെയ്തതുമായി ബന്ധപ്പെട്ട് ദേശീയ അന്വേഷണ ഏജന്സി ഉദ്യോഗസ്ഥര് സി ആപ്റ്റില് പരിശോധന നടത്തി. എന്ഐഎ കൊച്ചി യൂണിറ്റില് നിന്ന് എത്തിയ ഉദ്യോഗസ്ഥര് സി ആപ്റ്റിലെ ഡെലിവറി വിഭാഗത്തിലെ ഉദ്യോഗസ്ഥനെ ചോദ്യം ചെയ്യാന് കൊണ്ടുപോയി.
യുഎഇ കോണ്സുലേറ്റില് നിന്ന് 32 മതഗ്രന്ഥങ്ങളുടെ പാക്കറ്റുകള് ഡെലിവറി വിഭാഗത്തിലാണ് എത്തിച്ചത്. പിന്നീട് ഒരു പാക്കറ്റ് പൊട്ടിച്ച് ജീവനക്കാരില് ചിലര്ക്കു മതഗ്രന്ഥം വിതരണം ചെയ്തതായി പറയുന്നു. അതിനുശേഷം ബാക്കി 31 പാക്കറ്റുകള് മലപ്പുറത്തേക്കു കൊണ്ടുപോകുകയായിരുന്നു.
പൊട്ടിച്ച പാക്കറ്റ് സി ആപ്റ്റില് സൂക്ഷിച്ചു. മാര്ച്ച് 4നാണു നയതന്ത്ര പാഴ്സലില് 250 പാക്കറ്റുകളിലായി മതഗ്രന്ഥം എത്തിച്ചത്. മതഗ്രന്ഥങ്ങള് എത്തിച്ചതുമായി ബന്ധപ്പെട്ട് നേരത്തെ നിരവധി ആരോപണങ്ങള് ഉയര്ന്നിരുന്നു.
ഉന്നതവിദ്യാഭ്യാസവകുപ്പിനു കീഴിലാണ് സി ആപ്റ്റ് വരുന്നത്. യുഎഇ കോണ്സുലേറ്റ് വഴി മതഗ്രന്ഥം കൊണ്ടുവന്നത് പ്രോട്ടോകോള് ലംഘനമാണെന്നും ഉന്നതവിദ്യാഭ്യാസവകുപ്പ് മന്ത്രി കെ.ടി.ജലീല് കുറ്റക്കാരനാണെന്നും പ്രതിപക്ഷം അടക്കം ആരോപിച്ചിരുന്നു. ഖുര്ആന് കൊണ്ടുവന്നതിന്റെ മറവില് സ്വര്ണം കടത്തിയിട്ടുണ്ടോ എന്ന് അന്വേഷിക്കണമെന്ന് കോണ്ഗ്രസും ബിജെപിയും ആരോപിച്ചതിനു പിന്നാലെ ജലീലിനെ എന്ഫോഴ്സ്മെന്റും എന്ഐഎയും ചോദ്യം ചെയ്തിരുന്നു.
അതേസമയം, തിരുവനന്തപുരം സ്വര്ണക്കടത്ത് കേസിലെ പ്രതി സ്വപ്ന സുരേഷിനെ നാല് ദിവസത്തേക്ക് എന്ഐഎ കസ്റ്റഡിയില് വിട്ടു. കൊച്ചിയിലെ എന്ഐഎ കോടതിയാണ് അന്വേഷണസംഘത്തിന്റെ അപേക്ഷ പരിഗണിച്ച് സ്വപ്നയെ കസ്റ്റഡിയില് വിട്ടത്.