പ്രളയ രക്ഷാപ്രവർത്തനത്തിനിടെ മരണപ്പെട്ട അബ്ദുൾ റസാഖിന്റെ കുട്ടികളുടെ വിദ്യാഭ്യാസം മോഹൻലാൽ ഏറ്റെടുത്തു
പ്രളയ രക്ഷാപ്രവർത്തനത്തിനിടെ മരണപ്പെട്ട പ്രവാസി മലപ്പുറം കാരത്തൂർ സ്വദേശിയായ അബ്ദുൽ റസാഖിന്റെ കുട്ടികളുടെ വിദ്യാഭ്യാസം മോഹൻലാൽ ഏറ്റെടുത്തു. വെള്ളക്കട്ടിൽ വീണ സഹോദരന്റെ മക്കളായ നിഹാൻ, അലാഹുദ്ദീൻ എന്നിവരെ രക്ഷിക്കാൻ ശ്രമിക്കുന്നതിനിടെയായിരുന്നു അബ്ദുൾ റസാഖിന് ജീവൻ നഷ്ടമായത്. മോഹൻലാൽ മരണപ്പെട്ട അബ്ദുൾ റസാഖിന്റെ മക്കളെ ഫോണിൽ വിളിക്കുകയും അവരെ ആശ്വസിപ്പിക്കുകയും ചെയ്തു.
മോഹൻലാലിൻറെ കീഴിൽ പ്രവർത്തിക്കുന്ന വിശ്വശാന്തിയുടെ ഡയറക്ടർ മേജർ രവിയും സംഘാടകരും അബ്ദുൾ റസാഖിന്റെ വീട് സന്ദർശിക്കുകയും അടിയന്തര സഹായമായി ഒരു ലക്ഷം രൂപയുടെ ചെക്ക് നൽകുകയും ചെയ്തു. പ്രളയ രക്ഷാപ്രവർത്തനത്തിനിടെ ജീവൻ നഷ്ടപ്പെട്ട ലിനുവിന്റെ കുടുംബത്തിനും സഹായഹസ്തവുമായി മോഹൻലാൽ എത്തിയിരുന്നു.