കോങ്ങാട് എംഎല്എ കെ.വി.വിജയദാസ് അന്തരിച്ചു
തൃശൂര്: കോങ്ങാട് എംഎല്എ കെ.വി.വിജയദാസ്(61) അന്തരിച്ചു. മുളങ്കുന്നത്തുകാവ് മെഡിക്കല് കോളജ് ആശുപത്രിയില് അതീവഗുരുതരാവസ്ഥയില് ചികിത്സയിലായിരുന്ന അദ്ദേഹം വൈകിട്ട് 7.45-ഓടെയാണ് മരിച്ചത്. അദ്ദേഹം മരുന്നുകളോട് പ്രതികരിക്കുന്നുണ്ടായിരുന്നില്ല. കോവിഡ് ബാധിതനായി ഡിസംബര് 11-നാണ് എംഎല്എ ആശുപത്രിയിലാകുന്നത്. പിന്നീട് കോവിഡ് നെഗറ്റീവായെങ്കിലും കോവിഡാനന്തര ആരോഗ്യപ്രശ്നങ്ങള് സ്ഥിതി ഗുരുതരമാക്കുകയായിരുന്നു. രക്തസമ്മര്ദ്ദം ഉയര്ന്നതിനെ തുടര്ന്ന് തലച്ചോറില് രക്തം കട്ടയാകുകയും അടിയന്തര ശസ്ത്രക്രിയയ്ക്ക് എംഎല്എയെ വിധേയനാക്കുകയും ചെയ്തിരുന്നു. വേലായുധന്-താത്ത ദമ്ബതികളുടെ മകനായി 1959-ല് പാലക്കാട്ടെ എലപ്പുള്ളിയിലാണ് കെ.വി വിജയദാസ് ജനിച്ചത്. കേരള സോഷ്യലിസ്റ്റ് യൂത്ത് ഫെഡറേഷന് എന്ന വിദ്യാര്ത്ഥി പ്രസ്ഥാനത്തിലൂടെയായിരുന്നു അദ്ദേഹത്തിന്റെ രാഷ്ട്രീയ പ്രവേശം.
രണ്ടാം തവണയാണ് വിജയദാസ് കോങ്ങാട് മണ്ഡലത്തെ പ്രതിനിധീകരിക്കുന്നത്. 2011-ലാണ് കോങ്ങാട് നിയോജകമണ്ഡലത്തില് നിന്നും വിജയദാസ് ആദ്യമായി നിയമസഭയിലേക്ക് ജയിക്കുന്നത്. 2016-ല് യുഡിഎഫ് സ്ഥാനാര്ത്ഥി പന്തളം സുധാകരനെ 13000-ത്തോളം വോട്ടുകള്ക്ക് പരാജയപ്പെടുത്തിയിരുന്നു. സിപിഎം പാലക്കാട് ജില്ലാ കമ്മിറ്റി അംഗമായ അദ്ദേഹം പാലക്കാട് ജില്ലാ പഞ്ചായത്ത് അധ്യക്ഷ സ്ഥാനവും വഹിച്ചിട്ടുണ്ട്.