കാളിദാസ് ജയറാം വീണ്ടും തമിഴില്.! ചിത്രം 'ഒരു പക്കാ കഥൈ' ഒ. ടി. ടി റിലീസിന്
മലയാളികള്ക്ക് ഇന്നും ബാലതാരമായി കാണാന് ഇഷ്ട്ടമുള്ള താരമാണ് കാളിദാസ് ജയറാം. താരം വളര്ന്ന് വലുതായി നായകനായി എത്തിയിട്ടും നമുക്ക് അതേ ഇഷ്ട്ടമായിരുന്നു കാളിദാസിനോട്. പൂമരം എന്ന ചിത്രത്തിലൂടെയാണ് കാളിദാസ് വീണ്ടും പ്രേക്ഷകര്ക്ക് മുന്നിലെത്തിയത്. ഇപ്പോഴിതാ പ്രിയ താരം കാളിദാസ് ജയറാം നായകനായി അഭിനയിച്ച തമിഴ് ചിത്രം 'ഒരു പക്കാ കഥൈ' ഒ. ടി. ടി പ്ലാറ്റ്ഫോം വഴി റിലീസിനു തയാറെടുക്കുന്നു. 2014-ല് ചിത്രീകരണം തീര്ന്നിരുന്ന ചിത്രത്തിന്റെ റിലീസ് പല കാരണങ്ങളാല് തടസ്സപ്പെടുകയും നീണ്ടുപോകുകയുമായിരുന്നു. സെപ്റ്റംബര് 25 നാണ് അണിയറ പ്രവര്ത്തകര് ചിത്രത്തിന്റെ ഒ.ടി.ടി റിലീസ് പ്രഖ്യാപിച്ചിരിക്കുന്നത്.
ബാലാജി തരണീതരം ആണ് ചിത്രം അണിയിച്ചൊരുക്കുന്നത്. മേഘ ആകാശ് ആണ് ചിത്രത്തില് നായികയായി എത്തുന്നത്. രണ്ട് ചെറുപ്പക്കാരായ യുവതി-യുവാക്കളുടെ പ്രണയവും, തുടര്ന്ന് പെണ്കുട്ടി ഗര്ഭിണിയാകുന്നതും പിന്നീട് വരുന്ന ഒരു മെഡിക്കല് സങ്കീര്ണതയുമാണ് ചിത്രത്തിന്റെ ഉള്ളടക്കം. സംഗീതം കൊണ്ട് വളരെ വേഗത്തില് ആസ്വാദക ഹൃദയം കീഴടക്കിയ ഗോവിന്ദ് വസന്തയാണ് ചിത്രത്തിന്റെ സംഗീതം.