"കെ ഫോണ്‍' പദ്ധതി ഡിസംബറില്‍ പൂര്‍ത്തിയാകും; രാജ്യത്തെ ഏറ്റവും ശക്തമായ ശൃംഖലയായി മാറും: മുഖ്യമന്ത്രി

News Desk

29 May 2020 08:38 PM

തിരുവനന്തപുരം: ഇന്റെർനെറ്റിനുള്ള അവകാശം പൗരന്മാരുടെ അടിസ്ഥാന അവകാശമായി പ്രഖ്യാപിച്ച സംസ്ഥാനമാണ് നമ്മുടേതെന്നും ഇതിന്റെ ഭാഗമായാണ് പാവപ്പെട്ടവർക്ക് സൗജന്യമായും മറ്റുള്ളവർക്ക് താങ്ങാവുന്ന നിരക്കിലും ഗുണമേന്മയുള്ള ഇന്റർനെറ്റ് ഉറപ്പാക്കാനായി കെ ഫോൺ പദ്ധതി ആവിഷ്കരിച്ചതെന്നും മുഖ്യമന്ത്രി പിണറായി വിജയൻ. പദ്ധതി ഈ വർഷം ഡിസംബറിൽ തന്നെ പൂര്ത്തിയാകുമെന്ന് കൺസോഷ്യം ഉറപ്പ് നല്കിയെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.

ഇന്ത്യയിലെ മറ്റൊരു സംസ്ഥാനവും ഇത്തരമൊരു പദ്ധതി നടപ്പാക്കിയിട്ടില്ലെന്നും മുഖ്യമന്ത്രി പറഞ്ഞു. 1500 കോടി രൂപ ചിലവ് വരുന്ന ഈ പദ്ധതി നടപ്പാക്കുന്നതിന് കേന്ദ്ര സര്ക്കാരിന് കീഴിലുള്ള രണ്ട് കമ്പനികൾ ഉൾപ്പെടുന്ന കൺസോഷ്യമാണ്. ഭാരത് ഇലക്ട്രോണിക് ലിമിറ്റഡ്, റെയിൽ ടെൽ എന്നീ പൊതു മേഖലാ കമ്പനികളും എസ്‌ആർ‌ഐടി, എൽ‌എസ് കേബിള്സ് എന്നീ സ്വകാര്യ കമ്പനികളും ചേർന്നതാണ് കൺസോഷ്യം.

കൺസോഷ്യത്തിലെ കമ്പനികളുടെ മേധാവികളുമായി ഇന്ന് വീഡിയോ കോൺഫറൻസ് നടത്തി. പ്രവർത്തിയുടെ പുരോഗതി വിലയിരുത്തി. ലോക്ക്ഡൗൺ കാരണം രണ്ട് മാസത്തോളമായി പ്രവർത്തികൾ മുടങ്ങിപ്പോയ സാഹചര്യത്തിലാണ് ഇന്ന് യോഗം നടത്തിയത്. ഈ വർഷം ഡിസംബറിൽ തന്നെ പദ്ധതി പൂർത്തിയാക്കാമെന്ന് കൺസോഷ്യം ലീഡറായ എം.വി. ഗൗതം ഉറപ്പ് നല്കിയെന്നും മുഖ്യമന്ത്രി പറഞ്ഞു.

കേരളത്തെ സംബന്ധിച്ച്‌ പദ്ധതിയുടെ പൂർത്തീകരണം വലിയ നേട്ടമായിരിക്കുമെന്നും മുഖ്യമന്ത്രി കൂട്ടിച്ചേർത്തു. സംസ്ഥാനം വിഭാവനം ചെയ്യുന്ന വിജ്ഞാനധിഷ്ടിത സമ്പദ് വ്യവസ്ഥക്ക് കെ ഫോൺ ഉത്തേജ്ജനം നല്കുമെന്നും കേരളത്തിലേക്ക് വ്യവസായ നിക്ഷേപം ആകർഷിക്കാനുള്ള ശ്രമങ്ങൾക്ക് ഇത് ഊർജം പകരുമെന്നും അദ്ദേഹം പറഞ്ഞു. ഇന്ത്യയിൽ ഏറ്റവും ശക്തമായ ഇന്റർനെറ്റ് ശൃംഘലയായിരിക്കും കെ ഫോൺ. കേരള സ്റ്റേറ്റ് ഐടി ഇന്ഫ്രാസ്ട്രക്ചർ ലിമിറ്റഡ് എന്ന കമ്പനിയും കെഎസ്‌ഇബിയും യോജിച്ചാണ് കെഫോൺ നടപ്പാക്കുന്നത്. കെഎസ്‌ഇബിയുടെ ലൈനുകളിലൂടെയാണ് ഒപ്ടിക്കല് ഫൈബർ കേബിൾ ഉപഭോക്താക്കളിലേക്ക് എത്തുന്നതെന്നും മുഖ്യമന്ത്രി പറഞ്ഞു.