ഇന്ത്യയ്ക്ക് ആധികാരിക ജയം
അഹമ്മദാബാദ്: ഇംഗ്ലണ്ടിനെതിരായ പിങ്ക് ബോള് ടെസ്റ്റില് ഇന്ത്യയ്ക്ക് ആധികാരിക ജയം.വെറും രണ്ടു ദിവസം കൊണ്ട് ഇംഗ്ലണ്ടിനെ അടിയറവ് പറയിച്ചാണ് ഇന്ത്യ മൂന്നാം ക്രിക്കറ്റ് ടെസ്റ്റില് വിജയം സ്വന്തമാക്കിയത്.
രണ്ടാം ഇന്നിംഗ്സില് ജയിക്കാന് 49 റണ്സ് വേണ്ടിയിരുന്ന ഇന്ത്യ വിക്കറ്റ് നഷ്ടമില്ലാതെ വിജയത്തിലെത്തി. 15 റണ്സെടുത്ത് ശുഭ്മാന് ഗില്ലും 25 റണ്സെടുത്ത രോഹിത് ശര്മയും ചേര്ന്ന് ഇന്ത്യയെ 7.4 ഓവറില് വിജയത്തിലെത്തിച്ചു. സ്കോര് ഇംഗ്ലണ്ട്: 112, 81. ഇന്ത്യ: 145, 49/0.
അക്സര് പട്ടേലിന്റെയും ആര്. അശ്വിന്റെയും മിന്നും പ്രകടനമാണ് ഇന്ത്യയ്ക്ക് അനായാസ വിജയം സമ്മാനിച്ചത്. രണ്ട് ഇന്നിംഗ്സുകളില്നിന്നായി പട്ടേല് 11 വിക്കറ്റും അശ്വിന് ഏഴ് വിക്കറ്റും സ്വന്തമാക്കി. ഇതോടെ ടെസ്റ്റില് 400 വിക്കറ്റ് എന്ന നേട്ടവും അശ്വന് കൈവരിച്ചു.
രണ്ടാം ദിനം മൂന്ന് വിക്കറ്റ് നഷ്ടത്തില് 99 റണ്സിന് ബാറ്റിംഗ് പുനരാരംഭിച്ച ഇന്ത്യയ്ക്ക് 46 റണ്സ് മാത്രമാണ് കൂട്ടിച്ചേര്ക്കാന് സാധിച്ചത്. ഇംഗ്ലണ്ട് നായകന് ജോ റൂട്ടിന്റെ അഞ്ച് വിക്കറ്റ് പ്രകടനമാണ് ഇന്ത്യയ്ക്ക് ആദ്യ ഇന്നിംഗ്സില് തിരിച്ചടിയായത്. ജോ റൂട്ടിനൊപ്പം ജാക്ക് ലീഷും ചേര്ന്ന് ഇന്ത്യന് ബാറ്റ്സ്മാന്മാര്ക്കായി സ്പിന് വല വിരിച്ചത്. ജാക്ക് ലീഷ് നാല് വിക്കറ്റാണ് ഇന്നിംഗ്സില് നേടിയത്.
രണ്ടാം ഇന്നിംഗ്സില് ബാറ്റ് ചെയ്ത ഇംഗ്ലണ്ടിനെ വെറും 81 റണ്സിന് ഇന്ത്യ പുറത്താക്കി. 32 റണ്സ് വഴങ്ങി അഞ്ചു വിക്കറ്റെടുത്ത പട്ടേലും 48 റണ്സ് വഴങ്ങി നാലു വിക്കറ്റെടുത്ത അശ്വിനും ഇംഗ്ലണ്ട് ബാറ്റിംഗ് നിരയെ തരിപ്പണമാക്കി.
25 റണ്സെടുത്ത ബെന് സ്റ്റോക്സ് മാത്രമാണ് ഇംഗ്ലണ്ട് നിരയില് പിടിച്ചുനിന്നത്. രണ്ടാം ദിനം 17 വിക്കറ്റുകളാണ് വീണത്. ഇംഗ്ലണ്ട് ഇന്ത്യയ്ക്കെതിരേ ടെസ്റ്റില് നേടുന്ന ഏറ്റവും ചെറിയ സ്കോറാണിത്. അക്സര് പട്ടേലാണ് കളിയിലെ താരം.
ജയത്തോടെ ഇന്ത്യ ഐസിസി ലോക ടെസ്റ്റ് ചാന്പ്യന്ഷിപ്പിന്റെ ഫൈനല് ഉറപ്പിച്ചു.