ഹോട്ടലുകളില് ആളുകള് തിങ്ങി നിറയരുത്, ലംഘിച്ചാല് കര്ശന നടപടി: മുഖ്യമന്ത്രി
തിരുവനന്തപുരം: കരുതലില്ലാതെ ഭക്ഷണശാലകള് നടത്തുന്നവര്ക്കെതിരേ കര്ശന നടപടി സ്വീകരിക്കുമെന്നു മുഖ്യമന്ത്രി പിണറായി വിജയന്. ഹോട്ടലുകളില് വേണ്ടത്ര അകലം പാലിക്കാതെ ആളുകള് തിങ്ങി നിറയുന്നത് ഹോട്ടലിന്റെ നടത്തിപ്പുകാര് അനുവദിക്കരുതെന്നും അദ്ദേഹം നിര്ദേശിച്ചു.
വിദേശ രാജ്യങ്ങളില് ഭക്ഷണശാലകളില് നിന്നും പബ്ബുകളില് നിന്നുമാണ് രോഗബാധ കൂടുന്നതെന്നു കണ്ടെത്തിയിട്ടുണ്ട്. ഹോട്ടലുകളുടെ എണ്ണമെടുത്താല് ഏറ്റവും കൂടുതലുള്ള സംസ്ഥാനമാണ് കേരളം. അതുകൊണ്ടുതന്നെ കൂട്ടംകൂടേണ്ട ആവശ്യമില്ല. ഹോട്ടലുകളിലെ എസി മുറികളില് ശാരീരിക അകലം പാലിക്കാതെ ആളുകള് തിങ്ങിനിറഞ്ഞ് ഇരിക്കരുതെന്നും അദ്ദേഹം ആവശ്യപ്പെട്ടു.
വഴിയോര കടകള്ക്കു മുന്പില് കൂട്ടംകൂടുന്നതും അനുവദിക്കാന് കഴിയില്ല. ജാഗ്രതയോടെ ഹോട്ടലുകള് പ്രവര്ത്തിക്കണം. ജാഗ്രതയോടെ വേണം പൊതുജനങ്ങള് ഹോട്ടലുകള് സന്ദര്ശിക്കാനെന്നും മുഖ്യമന്ത്രി പറഞ്ഞു.