തിരുവനന്തപുരം മെഡിക്കല്‍ കോളേജില്‍ തുടരെത്തുടരെ വീഴ്ചകള്‍; ആരോഗ്യമന്ത്രിക്ക് അതൃപ്‌തി

News Desk

11 June 2020 10:06 AM

തിരുവനന്തപുരം: തിരുവനന്തപുരം മെഡിക്കല്‍ കോളജിലെ തുടര്‍ച്ചയായ വീഴ്ചകളില്‍ അതൃപ്തിയറിച്ച്‌ ആരോഗ്യമന്ത്രി. മെഡിക്കല്‍ കോളേജ് ആശുപത്രിയിലെ കൊവിഡ് ഐസലേഷന്‍ വാര്‍ഡില്‍ ആറു മണിക്കൂറിനിടെയാണ് രണ്ടു യുവാക്കള്‍ തൂങ്ങിമരിച്ചത്. മദ്യാസക്തി കാരണമുള്ള അസ്വസ്ഥതകള്‍ പ്രകടിപ്പിച്ചിരുന്ന ഇരുവരേയും നിരീക്ഷിക്കുന്നതില്‍ ആശുപത്രി അധികൃതരുടെ ഭാഗത്ത് നിന്നുണ്ടായത് ഗുരുതര വീഴ്ചയാണ്. ആശുപത്രിയിലെ അണുനിയന്ത്രണ സംവിധാനം കാര്യക്ഷമമല്ലാത്തതിനെക്കുറിച്ചും വ്യാപക വിമര്‍ശനമുണ്ട്.

ആദ്യം തൂങ്ങി മരിച്ച ആനാട് സ്വദേശിയായ ഉണ്ണി ചൊവ്വാഴ്ച ഐസലേഷന്‍ വാര്‍ഡില്‍ നിന്ന് ആശുപത്രി വേഷത്തില്‍ ഇറങ്ങിപ്പോയിരുന്നു. നാട്ടിലെത്തി കറങ്ങിനടന്ന ഇയാളെ തിരിച്ചറിഞ്ഞ നാട്ടുകാരാണ് പൊലീസിറിയച്ചത്. ഇയാളുടെ അസ്വസ്ഥതകള്‍ വ്യക്തമായിരുന്നിട്ടും ശ്രദ്ധക്കുറവുണ്ടായെന്നാണ് വിലയിരുത്തല്‍. ആദ്യ മരണത്തില്‍ മെഡിക്കല്‍ വിദ്യാഭ്യാസ ഡയറക്ടറോട് അന്വേഷണത്തിന് നിര്‍ദേശിച്ച ആരോഗ്യ മന്ത്രി രണ്ടാമത്തെ മരണമുണ്ടായതോടെ വിഷയത്തി ന്‍റെ ഗൗരവം മനസിലാക്കി ആരോഗ്യ വകുപ്പ് പ്രിന്‍സിപ്പല്‍ സെക്രട്ടറിയോട് അന്വേഷണത്തിന് ഉത്തരവിട്ടു. പിന്നാലെ മെഡിക്കല്‍ കോളേജ് അധികൃതരെ വിളിച്ചു വരുത്തി ശാസിക്കുകയും ചെയ്‌തു.

കഴിഞ്ഞയാഴ്ച ദുബായില്‍ നിന്ന് കൊവിഡ് ലക്ഷണങ്ങളോടെ എത്തിയ പ്രവാസിയെ പരിശോധനാ ഫലം വരുന്നതിന് മുമ്ബ് വീട്ടിലേക്കയച്ച്‌ മെഡിക്കല്‍ കോളജ് വിവാദത്തിലായിരുന്നു. കൊവിഡ് സ്‌ഥിരീകരിച്ച ഇയാളെ പിന്നീട് തിരിച്ചു വിളിക്കുകയായിരുന്നു. ഇതില്‍ വീഴ്ച പറ്റിയെന്ന് ആരോഗ്യ മന്ത്രി സമ്മതിച്ചെങ്കിലും തുടര്‍ നടപടിയുണ്ടായില്ല.

രണ്ടാം തീയതി കൊവിഡ് ബാധിച്ച്‌ മരിച്ച വൈദികന്‍ ഒരു മാസം ആശുപത്രിയില്‍ ചികിത്സയില്‍ കഴിഞ്ഞിരുന്നു. 20 ന് ഡിസ്ചാര്‍ജ് ചെയ്ത ഇദ്ദേഹത്തെ 23 ന് പനി ബാധിച്ച്‌ ചികിത്സക്കെത്തിച്ചെങ്കിലും കാര്യമായെടുത്തില്ലെന്ന് ആക്ഷേപമുയര്‍ന്നിരുന്നു. സ്രവപരിശോധന വൈകിയെന്നും പരാതിയുയര്‍ന്നു.