ജനറൽ ആശുപത്രിയിൽ മികച്ച സൗകര്യങ്ങൾ
തിരുവനന്തപുരം : കോവിഡ്- 19 രോഗ ലക്ഷണങ്ങളോടെ ഐസൊലേഷനിൽ കഴിയുന്നവർക്ക് മികച്ച സൗകര്യങ്ങൾ ഒരുക്കി തിരുവനന്തപുരം ജനറൽ ആശുപത്രി. ഇവിടെ കഴിയുന്നവർക്ക് പഴവർഗ്ഗങ്ങൾ അടക്കമുള്ള പോഷക സമൃദ്ധമായ ഭക്ഷണമാണ് നൽകുന്നത്. മികച്ച ചികിത്സയ്ക്കൊപ്പം ആവശ്യമായ ടൂത്ത്ബ്രഷ് , സോപ്പ്, ടവൽ മുതൽ പത്രം, മാഗസിൻ എന്നിവ വരെ എത്തിച്ചു നൽകുന്നു.
29 ഐസൊലേഷൻ വാർഡുകളാണ് ജനറൽ ആശുപത്രിയിൽ ഉള്ളത്. അറ്റാച്ച് ചെയ്ത ശുചിമുറികൾ ഉള്ളവയാണ് എല്ലാം. തിരുവനന്തപുരം വിമാനത്താവളത്തിൽ നിന്ന് സ്ക്രീനിങ്ങിനു ശേഷം രോഗ ലക്ഷണങ്ങളുള്ളവരെ ഇവിടെ എത്തിക്കുകയും തുടർ പരിശോധനയ്ക്ക് ശേഷം ചികിത്സ ആവശ്യമുള്ളവരെ ഐസോലേഷൻ വാർഡിലേക്ക് മാറ്റുകയും ചെയ്യുന്നു. അതേസമയം വീട്ടിൽ നിരീക്ഷണത്തിൽ കഴിയേണ്ടവരാണെങ്കിൽ ആംബുലൻസിൽ വീടുകളിൽ എത്തിക്കുന്നു. വടക്കൻ ജില്ലകളിലടക്കം ജനറൽ ആശുപത്രി ആംബുലൻസ് സേവനവുമായി എത്തിയിട്ടുണ്ട്. ജനറൽ ആശുപത്രിയിലെ കോവിഡ് 19 ഒ. പി.യുമായി ചേർന്ന് തന്നെ ഫാർമസിയും പ്രവർത്തിച്ചുവരുന്നു.
ഇപ്പോൾ 16 പേരാണ് ഐസൊലേഷൻ വാർഡുകളിൽ കഴിയുന്നത്. ഇവർക്കായി ഡോക്ടർമാർ, നേഴ്സ്മാർ, ഹൗസ് സർജൻസ് മുതൽ ക്ലീനിംഗ് സ്റ്റാഫ് വരെ ഒറ്റ ടീമായി പ്രവർത്തിക്കുന്നു. നിലവിലെ സാഹചര്യം നേരിടാൻ വേണ്ട പരിശീലനവും ഇവർക്ക് നൽകിയിരുന്നു.
ജനറൽ ആശുപത്രി സൂപ്രണ്ട് ഡോ. ജെ. പത്മലതയുടെ നേതൃത്വത്തിലാണ് കോവിഡ്- 19 പ്രതിരോധ പ്രവർത്തനങ്ങൾ ഏകോപിപ്പിക്കുന്നത്.
കോവിഡ്- 19 ഒരാളിൽ നിന്നും മറ്റൊരാളിലേക്ക് പകരാതിരിക്കാൻ ജനറൽ ആശുപത്രി ഒ. പിയിലും പ്രത്യേകം സംവിധാനങ്ങൾ ഒരുക്കിയിട്ടുണ്ട്. രോഗികൾക്ക് ഒരു മീറ്റർ അകലം പാലിക്കാൻ തക്ക രീതിയിൽ ക്യൂ സിസ്റ്റം പുന:ക്രമീകരിച്ചു. വിവിധയിടങ്ങളിൽ കൈ കഴുകാനുള്ള സൗകര്യവും, ഹാൻഡ് സാനിറ്റയിസർ, മാസ്ക് എന്നിവയും ഒ. പിയി ലെത്തുന്ന വർക്കായി സജ്ജീകരിച്ചിട്ടുണ്ട്.