കൊവിഡ് : സി.ബി.എസ്.ഇ 9 മുതല്‍ 12 വരെയുള്ള ക്ലാസുകളിലെ സിലബസ് 30% കുറയ്ക്കും
ന്യൂഡല്‍ഹി: കൊവിഡ് വ്യാപനത്തെ തുടര്‍ന്ന് രാജ്യത്തെ സി.ബി.എസ്.ഇ ഒന്‍പതു മുതല്‍ 12 വരെ ക്ലാസുകളിലെ സിലബസ് 30 ശതമാനം ഈ അധ്യായന വര്‍ഷത്തില്‍ വെട്ടിക്കുറച്ചു. കേന്ദ്രമാനവവിഭവശേഷി മന്ത്രി രമേഷ് പൊഖ്രിയാല്‍ ആണ് സിലബസ് വെട്ടിക്കുറച്ച വിവരം അറിയിച്ചത്.
കൊവിഡ് പ്രതിസന്ധിയെ തുടര്‍ന്ന് സ്‌കൂളുകള്‍ തുറന്നു പ്രവര്‍ത്തിക്കാന്‍ സാധിക്കാത്തതിനാല്‍ വിദ്യാര്‍ത്ഥികളുടെ അധ്യായന സമയം കുറഞ്ഞതിനാലാണ് ഇങ്ങനെയൊരു തീരുമാനം. സിബിഎസ്‌ഇ ഭരണസമിതിയുടെയും കരിക്കുലം സമിതിയുടെയും അംഗീകാരത്തോടെ പുതുക്കിയ സിലബസിന് അതതു കോഴ്സ് കമ്മിറ്റികള്‍ അന്തിമരൂപം നല്‍കിയതായി സിബിഎസ്‌ഇ പത്രക്കുറിപ്പില്‍ അറിയിച്ചു. ഇപ്പോള്‍ കുറച്ച പാഠഭാഗങ്ങള്‍ മറ്റു വിഷയങ്ങളുമായി ബന്ധപ്പെടുത്തുന്നതിന് ആവശ്യമായ തോതില്‍ വിദ്യാര്‍ഥികള്‍ക്കു വിശദീകരിച്ചു കൊടുക്കണമെന്ന് അധ്യാപകര്‍ക്കും സ്കൂള്‍ പ്രിന്‍സിപ്പല്‍മാര്‍ക്കും നിര്‍ദേശം നല്‍കി. എന്നാല്‍, കുറവു ചെയ്ത ഭാഗങ്ങളില്‍ നിന്നു പരീക്ഷയില്‍ ചോദ്യങ്ങള്‍ ഉണ്ടാകില്ലെന്നും സിബിഎസ്‌ഇ അറിയിച്ചു. ലോകമെങ്ങുമുള്ള അസാധാരണ സ്ഥിതിവിശേഷം പരിഗണിച്ചാണു കുട്ടികളുടെ പഠനഭാരം ലഘൂകരിക്കുന്നത്.
രാജ്യമെങ്ങുംനിന്നു ലഭിച്ച 1500-ലേറെ നിര്‍ദേശങ്ങള്‍കൂടി കണക്കിലെടുത്താണു തീരുമാനമെന്നു മന്ത്രി പറഞ്ഞു. അതിനിടെ, 25 ശതമാനം കുറവ് വരുത്തിക്കൊണ്ടുള്ള പുതിയ സിലബസ് ഐ.സി.എസ്.ഇ പ്രസിദ്ധീകരിച്ചിരുന്നു. വിവിധ സംസ്ഥാനങ്ങളും പാഠ്യപദ്ധതി കുറയ്ക്കുന്നതിനെക്കുറിച്ചുള്ള ആലോചനകള്‍ ആരംഭിച്ചു. കേരള സിലബസിന്റെ കാര്യത്തില്‍ തീരുമാനം ഈയാഴ്ച ഉണ്ടാകുമെന്ന് അധികൃതര്‍ അറിയിച്ചു.
കൊവിഡ് വ്യാപനത്തെ തുടര്‍ന്ന് മാര്‍ച്ച്‌ 16 മുതല്‍ രാജ്യത്തെ വിദ്യാലയങ്ങള്‍ അടഞ്ഞു കിടക്കുകയാണ്. മാര്‍ച്ച്‌ 24നാണ് ദേശീയതലത്തില്‍ ലോക്ക് ഡൗണും പ്രഖ്യാപിച്ചത്. സ്‌കൂളുകള്‍ തുറക്കുന്ന കാര്യത്തില്‍ ഇതുവരെ തീരുമാനം ആയിട്ടില്ല.
Related News
കോവിഡ് ഡ്യൂട്ടിക്ക് ഹാജരാകാത്ത രണ്ട് ഡോക്ടര്മാരെ പിരിച്ചു വിട്ടു
51,887 പേര്ക്ക് കോവിഡ്-19 സ്ഥിരീകരിച്ചു
ഇന്ന് 16,671 പേര്ക്ക് കോവിഡ്; രോഗമുക്തി നേടിയവര് 14,242
പ്രഖ്യാപിച്ചത് വന് ഇളവുകള്, കടകള് രാത്രി ഒന്പതുവരെ തുറക്കാം , കല്യാണത്തിനും മരണത്തിനും ഇരുപതുപേര് മാത്രം