കണ്ണൂര് വിമാനത്താവളത്തില് കാര്ഗോ കോംപ്ലക്സ് റെഡി
മട്ടന്നൂര് : കണ്ണൂര് അന്താരാഷ്ട്ര വിമാനത്താവളത്തില് കാര്ഗോ കോംപ്ളക്സിന്റെ പ്രവര്ത്തനം തുടങ്ങി. 1200 ചതുരശ്ര മീറ്റര് വിസ്തൃതിയുള്ള കാര്ഗോ കോംപ്ലക്സില് 12000 മെട്രിക് ടണ് ചരക്ക് നീക്കത്തിന് ശേഷിയുള്ളതാണ് . ആദ്യ കാര്ഗോ ഇന്ഡിഗോ എയര്ലൈന്സിനാണ്. എളുപ്പത്തില് നശിച്ചുപോവുന്ന മത്സ്യ മാംസങ്ങള്, പൂക്കള്, പഴങ്ങള്, പാല് ഉല്പ്പന്നങ്ങള് എന്നിവയും എഫ്.എം.സിജി ഉത്പന്നങ്ങള്, കൈത്തറി, തുണിത്തരങ്ങള്, കരകൗശല വസ്തുക്കള്, ഡ്രൈ ഫ്രൂട്ട്സ്, വേര്ജിന് വെളിച്ചെണ്ണ, മറ്റു ഉത്പന്നങ്ങള് എന്നിവയുമാണ് കയറ്റിയയക്കുന്നത്. 5800 ചതുരശ്ര മീറ്റര് വിസ്തീര്ണത്തില് 55000 മെട്രിക് ടണ് ചരക്ക് നീക്കത്തിനു സാധിക്കുന്ന കാര്ഗോ കോംപ്ലക്സിന്റെ നിര്മാണം നടന്നുവരികയാണ്. ഇത് പൂര്ണമായും അന്താരാഷ്ട്ര ചരക്ക് നീക്കത്തിനായിരിക്കും .
മുഖ്യമന്ത്രി പിണറായി വിജയന് ഓണ്ലൈനായാണ് ഉദ്ഘാടനം നിര്വഹിച്ചത്. കേന്ദ്ര വ്യോമയാന സഹമന്ത്രി ഹര്ദീപ് സിംഗ് പുരി മുഖ്യാതിഥിയായി. മന്ത്രി ഇ. പി. ജയരാജന് അദ്ധ്യക്ഷത വഹിച്ചു.തുറമുഖ പുരാവസ്തു വകുപ്പ് മന്ത്രി രാമചന്ദ്രന് കടന്നപ്പള്ളി ഭദ്ര ദീപം കൊളുത്തി. ശിലാഫലക അനാച്ഛാദനവും അദ്ദേഹം നിര്വഹിച്ചു.പുതുതായി ആരംഭിക്കുന്ന ഡ്യൂട്ടി ഫ്രീ ഷോപ്പിന്റെ ഉദ്ഘാടനം കിയാല് മാനേജിങ് ഡയരക്ടര് വി തുളസിദാസ് നിര്വഹിച്ചു.
മന്ത്രിമാരായ ഇ. ചന്ദ്രശേഖരന്, എ. കെ. ശശീന്ദ്രന്, കെ .കെ. ശൈലജ , എം .പിമാരായ കെ. സുധാകരന്, കെ .കെ. രാഗേഷ്, മട്ടന്നൂര് നഗരസഭാ ചെയര്പേഴ്സണ് അനിത വേണു, വൈസ് ചെയര്മാന് പി.പുരുഷോത്തമന്, കീഴല്ലൂര് പഞ്ചായത്ത് വൈസ് പ്രസിഡന്റ് അനില് കുമാര് എന്നിവര് ചടങ്ങില് പങ്കെടുത്തു.