രണ്ട് ദിവസത്തെ രാജ്യവ്യാപക പണിമുടക്ക് പ്രഖ്യാപിച്ച് ബാങ്ക് യൂണിയനുകള്
കൊല്ക്കത്ത: രണ്ട് ദിവസത്തെ രാജ്യവ്യാപക പണിമുടക്കിന് ബാങ്ക് യൂണിയനുകളുടെ ആഹ്വാനം. ജനുവരി 31 നും ഫെബ്രുവരി ഒന്നിനുമാണ് പണിമുടക്ക്. വേതന വര്ധനവ് ആവശ്യപ്പെട്ട് ഇന്ത്യന് ബാങ്ക്സ് അസോസിയേഷനുമായി തൊഴിലാളി സംഘടനകള് നടത്തിയ ചര്ച്ച പരാജയപ്പെട്ടതോടെയാണ് പണിമുടക്ക് പ്രഖ്യാപിച്ചത്.
വിവിധ ബാങ്ക് തൊഴിലാളി യൂണിയനുകള് സമരത്തിന് ആഹ്വാനം ചെയ്തു. ജനുവരിയില് നടക്കാന് പോകുന്ന രണ്ടാമത്തെ ബാങ്ക് സമരമാണിത്. ജനുവരി എട്ട് തൊഴിലാളി സംഘടനകള് നടത്തിയ ദേശവ്യാപക പണിമുടക്കില് ബാങ്ക് യൂണിയനുകളും പങ്കെടുത്തിരുന്നു. കേന്ദ്ര സര്ക്കാര് ബജറ്റ് അവതരണത്തിന് തയ്യാറെടുക്കുന്ന വേളയിലാണ് രണ്ട് ദിവസം നീണ്ട് നില്ക്കുന്ന ദേശവ്യാപക ബാങ്ക് സമരം.രാജ്യവ്യാപക സമരത്തില് തങ്ങളുടെ ആവശ്യം അംഗീകരിക്കപ്പെട്ടില്ല എന്നുണ്ടെങ്കില് മാര്ച്ച് 11 മുതല് 13 വരെ മൂന്ന് ദിവസം തുടര്ച്ചയായി പണിമുടക്കാനും യൂണിയനുകള് തീരുമാനിച്ചിട്ടുണ്ട്.