ആറ്റിങ്ങല്‍ കഞ്ചാവ് കേസ്; 4 പ്രതികള്‍ക്കും ജാമ്യമില്ല

News Desk

17 February 2021 10:38 PM

ആറ്റിങ്ങല്‍ ആലംകോട് അടഞ്ഞു കിടന്ന ബാംബു ഹോട്ടലില്‍ റിസോര്‍ട്ടുകള്‍ കേന്ദ്രീകരിച്ചുള്ള ഓണ്‍ലൈന്‍ വില്‍പനക്കായി സൂക്ഷിച്ച നാല്പതു കിലോ കഞ്ചാവ് പിടിച്ചെടുത്ത കേസില്‍ റിമാന്‍്റില്‍ കഴിയുന്ന 3 എഞ്ചിനീയറിംഗ് ബിരുദധാരികളടക്കം 4 പ്രതികള്‍ക്ക് ജാമ്യമില്ല. തിരുവനന്തപുരം ഒന്നാം അഡീഷണല്‍ ജില്ലാ സെഷന്‍സ് ജഡ്ജി കെ.ബിജു മേനോനാണ് ഇവരുടെ ജാമ്യ ഹര്‍ജികള്‍ തള്ളിയത്. വിചാരണക്ക് മുന്നോടിയായ കുറ്റം ചുമത്തലിന് മാര്‍ച്ച്‌ 2ന് നാലു പ്രതികളെയും ഹാജരാക്കാന്‍ കോടതി പൂജപ്പുര സെന്‍‌ട്രല്‍ ജയില്‍ സൂപ്രണ്ടിന് പ്രൊഡക്ഷന്‍ വാറണ്ടയച്ചു.

പ്രതികളെ ജയിലിലിട്ട് കസ്റ്റോഡിയല്‍ വിചാരണ നടത്താനും കോടതി ഉത്തരവിട്ടു. ഗൗരവമേറിയ കുറ്റം ചെയ്ത പ്രതികളെ കുറ്റപത്രം സമര്‍പ്പിക്കപ്പെട്ട് വിചാരണ ആരംഭിക്കാനിരിക്കവേ ജാമ്യം നല്‍കി സ്വതന്ത്രരാക്കിയാല്‍ തെളിവു നശിപ്പിക്കാനും സാക്ഷികളെ സ്വാധീനിച്ചും ഭീഷണിപ്പെടുത്തിയും ആദ്യ മൊഴി വിചാരണയില്‍ തിരുത്തിച്ച്‌ കൂറുമാറ്റി പ്രതിഭാഗം ചേര്‍ത്ത് വിചാരണ അട്ടിമറിക്കാന്‍ സാധ്യതയുണ്ട്. ശിക്ഷ ഭയന്ന് പ്രതികള്‍ ഒളിവില്‍ പോകാനും സാധ്യതയുണ്ട്. അപ്രകാരം സംഭവിച്ചാല്‍ കേസ് വിചാരണക്ക് പ്രതികളെ കിട്ടാതെ കിടക്കുന്ന ലോംഗ് പെന്‍സിംഗ് കേസുകളുടെ പട്ടികയിലേക്ക് ഈ കേസും മാറ്റപ്പെടും. വിചാരണ വേഗത്തില്‍ തീര്‍പ്പാക്കാനും ജാമ്യം നിരസിച്ച ഉത്തരവില്‍ കോടതി ചൂണ്ടിക്കാട്ടി.

ആന്ധ്രയില്‍ നിന്ന് സവാള ലോറിയില്‍ കഞ്ചാവെത്തിച്ച്‌ ഹോട്ടലില്‍ സൂക്ഷിച്ച മുഖ്യ പ്രതി മണമ്ബൂര്‍ തൊപ്പിച്ചന്ത എഫ്.എഫ്. മന്‍സിലില്‍ എന്‍. ഫഹദ് (26) അടക്കമുള്ളവര്‍ സമര്‍പ്പിച്ച ജാമ്യ ഹര്‍ജികള്‍ തള്ളിക്കൊണ്ടാണ് കോടതി ഉത്തരവ്.

2020 സെപ്റ്റംബര്‍ 22 ന് രാത്രിയിലാണ് ആറ്റിങ്ങല്‍ ആലംകോട് അവിക്സ് സൊസൈറ്റിയുടെ കെട്ടിടത്തില്‍ വാടകക്ക് പ്രവര്‍ത്തിച്ചിരുന്ന ബാംബു ഹോട്ടലില്‍ നിന്ന് 40 കിലോ കഞ്ചാവ് എക്സൈസ് സംഘം പിടിച്ചെടുത്തത്. തിരുവനന്തപുരം , കൊല്ലം ജില്ലകളിലെ റിസോര്‍ട്ടുകള്‍ കേന്ദ്രീകരിച്ചായിരുന്നു കഞ്ചാവ് വില്‍പ്പന അരങ്ങേറിയത്.

ഓണ്‍ലൈനിലൂടെയും സമൂഹ മാധ്യമത്തിലൂടെയുമാണ് ഇടപാടുകാരുമായി ബന്ധപ്പെടുന്നത്. പണം കൈമാറലും ഓണ്‍ലൈന്‍ വഴിയായിരുന്നു. കഞ്ചാവ് കടത്താനുപയോഗിച്ച ലോറി , രണ്ട് ആഡംബര കാറുകള്‍ , നോട്ടെണ്ണല്‍ മെഷീന്‍ , രണ്ടു ത്രാസ്സുകള്‍ , 92,000 രൂപ എന്നിവ പ്രതികളില്‍ നിന്ന് എക്സൈസ് സംഘം പിടിച്ചെടുത്തു. ആന്ധ്രയില്‍ നിന്നും സവാളയും കന്നുകാലികളെയും കൊണ്ടുവരുന്ന ലോറികളിലാണ് കഞ്ചാവ് കടത്തിയിരുന്നത്.

തമിഴ്നാട്ടിലെ പൊള്ളാച്ചിയില്‍ നിന്ന് കോഴി ഫാമുകളിലേയ്ക്ക് കോഴികളെ കൊണ്ടുവരുന്ന ലോറിയിലും കഞ്ചാവ് കടത്തിയിരുന്നു. ലോക് ഡൗണ്‍ സമയത്ത് ഹോട്ടല്‍ അടച്ചിരുന്നു. തുടര്‍ന്ന് സവാള സംഭരിച്ച്‌ വ്യാപാരം തുടങ്ങി. ഇതിന്‍്റെ മറവിലാണ് മയക്കുമരുന്ന് വ്യാപാരം നടന്നത്. ഹോട്ടലിനുള്ളിലും ലോറിയിലും കീഴാറ്റിങ്ങല്‍ സ്വദേശി അര്‍ജുന്‍ നാഥിന്‍്റെ വീട്ടിലുമായാണ് കഞ്ചാവ് സൂക്ഷിച്ചത്. ഹാഷിഷ് ഓയിലും എല്‍ എസ് ഡി സ്റ്റാമ്ബും സംഘം വിറ്റിരുന്നതായും എക്സൈസിന് വിവരം ലഭിച്ചു.

വിദേശത്തായിരുന്ന ഗോകുല്‍ രാജ് അടുത്തിടെ നാട്ടില്‍ എത്തി ഇവര്‍ക്കൊപ്പം ചേരുകയായിരുന്നു. കീഴാറ്റിങ്ങല്‍ മുളവനത്ത് വീട്ടില്‍ പി. അര്‍ജുന്‍ നാഥ് (27) , കീഴാറ്റിങ്ങല്‍ എം.സി. നിവാസില്‍ എം. അജിന്‍ മോഹന്‍ (25) , ആറ്റിങ്ങല്‍ ഗവ. ജി.എച്ച്‌.എസ്.എസിന് സമീപം ചിത്തിരയില്‍ ആര്‍. ഗോകുല്‍ രാജ് (26) എന്നീ മൂന്നു പ്രതികള്‍ സംഭവ ദിവസം തന്നെ അറസ്റ്റിലായിരുന്നു.

സംഭവവുമായി ബന്ധമുണ്ടെന്ന് കരുതുന്ന ആലംകോട് സ്വദേശികളായ രണ്ടു പേരും കല്ലമ്ബലം സ്വദേശിയായ ഒരാളും അന്വേഷണ സംഘത്തിന്‍്റെ നിരീക്ഷണത്തിലാണെന്ന് എക്സൈസ് അവകാശപ്പെട്ടിരുന്നുവെങ്കിലും നാളിതു വരെ അവരെ തിരിച്ചറിഞ്ഞ് അറസ്റ്റ് ചെയ്തിട്ടില്ല. ഇവരുടെ ബാങ്കിടപാടുകള്‍ പരിശോധിച്ചതില്‍ വന്‍ ഇടപാട് നടന്നതിന്‍്റെ തെളിവുകള്‍ ലഭിച്ചു. 8 എ റ്റി എം കാര്‍ഡുകളും 4 ബാങ്ക് പാസ് ബുക്കുകളും പിടിച്ചെടുത്തു. അറസ്റ്റിലായി റിമാന്‍്റില്‍ കഴിയുന്ന നാലുപേരും സുഹൃത്തുക്കളാണ്. ഇവര്‍ ചേര്‍ന്നാണ് ആന്ധ്രയില്‍ നിന്നും കഞ്ചാവ് എത്തിച്ച്‌ ഓണ്‍ലൈന്‍ വഴി ഉപഭോക്താക്കള്‍ക്ക് കൈമാറുന്നത്. കഞ്ചാവെത്തിക്കുന്നത് ഫഹദിന്‍്റെ നേതൃത്വത്തിലാണെന്നാണ് എക്സൈസ് കേസ്.