സാമ്പത്തിക സംവരണം അട്ടിമറിക്കാന് ശ്രമം ; സുകുമാരന് നായര്
സംസ്ഥാന സര്ക്കാരിനെതിരെ വിമര്ശനവുമായി എന്എസ്എസ്. കേന്ദ്രസര്ക്കാര് കൊണ്ടുവന്ന സാമ്പത്തിക സംവരണം സംസ്ഥാന സര്ക്കാര് അട്ടിമറിക്കാന് ശ്രമിക്കുന്നതായി എൻഎസ്എസ് ജനറൽ സെക്രട്ടറി സുകുമാരന് നായര് ആരോപിച്ചു. ഫെബ്രുവരി 12ന് സംസ്ഥാന സര്ക്കാര് പുറപ്പെടുവിച്ച ഉത്തരവില് കുടുംബത്തെ ആശ്രയിച്ചു കഴിയുന്ന 18 വയസിനു മുകളിലുള്ള ആളുകളേയും കുടുംബം എന്ന നിര്വചനത്തിലാണ് ഉള്പ്പെടുത്തിയിരിക്കുന്നത്. ഇതോടെ അപേക്ഷകനോടൊപ്പം ഒരു വീട്ടില് കഴിയുന്ന പ്രായപൂര്ത്തിയായ സഹോദരങ്ങളുടെ വക ഭൂമിയും വരുമാനവും അപേക്ഷകന്റെ കുടുംബത്തിന്റെ വരുമാനത്തില് ഉള്പ്പെടും.
സംസ്ഥാന സര്ക്കാര് പുറപ്പെടുവിച്ച ഉത്തരവ് പ്രകാരം കാര്യങ്ങള് മുന്നോട്ട് പോയാല് ഭൂവിസ്തൃതി, വരുമാനം എന്നിവയ്ക്കുള്ള സര്ട്ടിഫിക്കറ്റുകള് ലഭിക്കാതെ അപേക്ഷകര് നട്ടംതിരിയുന്ന അവസ്ഥ ഉണ്ടാകും. എന്നാല് അപേക്ഷകന്, മാതാപിതാക്കള്, 18 വയസ്സില് താഴെയുള്ള സഹോദരങ്ങള്, അപേക്ഷകന്റെ പങ്കാളി, അപേക്ഷകന്റെ 18 വയസ്സില് താഴെ പ്രായമുള്ള കുട്ടികള് എന്നിവരാണ് കുടുംബം എന്ന നിര്വചനത്തില് ഉള്പ്പെടുക എന്ന് കേന്ദ്രസര്ക്കാര് വ്യക്തമാക്കിയിട്ടുള്ളതാണ്.