ആമസോൺ ഇന്ത്യയിൽ ഫുഡ്‌ഡലിവെറി സേവനങ്ങളുമായി എത്തുന്നു

Ajith.A

30 July 2019 11:55 AM

ആമസോൺ ഈ വർഷം ഇന്ത്യയിൽ വളർന്നുവരുന്ന ഓൺലൈൻ ഭക്ഷ്യ വിതരണ ബിസിനസ്സിലേക്ക് കടക്കാൻ ഒരുങ്ങുന്നു. ഐടി വ്യവസായിയായ നാരായണ മൂർത്തിയുടെ കാറ്റമരൻ എന്ന കമ്പനിയുമായി
ചേർന്ന് ജീവനക്കാരെ നിയമിക്കുന്നതിനുള്ള പദ്ധതികൾ നടന്നു വരികയാണ്. സെപ്റ്റംബറിൽ ആരംഭിക്കുന്ന ഒരു മാസം നീണ്ടുനിൽക്കുന്ന ഉത്സവ സീസണിന് മുന്നോടിയായി ആമസോൺ ഭക്ഷ്യ വിതരണ മേഖലയിലേക്ക് ചുവടുവയ്ക്കും എന്നാണ് അറിയുന്നത്.

ഇന്ത്യയിലെ മധ്യവർഗം കൂടുതലായി ഓൺലൈൻ ഭക്ഷ്യ വിതരണ മേഖലയെ ആശ്രയിക്കുന്നത് ഓൺലൈൻ ഭക്ഷ്യ വിതരണ മേഖലയുടെ വളർച്ചയ്ക്ക് കാരണമായതായി ഗവേഷണ സ്ഥാപനമായ റെഡ്സീർ കൺസൾട്ടിംഗ് പറയുന്നു. സ്വിഗ്ഗി , സോമറ്റോ എന്നിവരുമായി ആമസോൺ ചർച്ചകൾ പുരോഗമയ്ക്കുന്നതായി റിപ്പോർട്ടുകളുണ്ട്.

യൂബർ ടെക്നോളജീസ് 2017 ൽ ഇന്ത്യ ഭക്ഷ്യ വിതരണ സേവനം ആരംഭിച്ചെങ്കിലും പ്രാദേശിക വിപണിയിലെ മത്സരത്തിൽ പിടിച്ചു നില്ക്കാൻ ഉബറിന് കഴിഞ്ഞിട്ടില്ല. ഇതിനാൽ തന്നെ ആമസോൺ ഉബറിന്റെ ഇന്ത്യയിലെ ഭക്ഷ്യ വിതരണ സേവനം വാങ്ങിയേക്കും എന്നും സ്ഥിതീകരിക്കാത്ത റിപ്പോർട്ടുകൾ പറയുന്നു.

അമേരിക്കയിലെ കടുത്ത മത്സരത്തെ തുടർന്ന് ആമസോൺ കഴിഞ്ഞ മാസം അമേരിക്കയിലെ ഭക്ഷ്യ വിതരണ പ്രവർത്തനങ്ങൾ നിർത്തുകയും ചെയ്തിരുന്നു. ഇതിനു ശേഷമാണു ഇന്ത്യയിലേക്കുള്ള ചുവടു മാറ്റം എന്നതും ശ്രദ്ധേയമാണ്.