അകൗണ്ടില്‍ പണമില്ല; അയോധ്യ രാമക്ഷേത്ര നിര്‍മാണത്തിനായി സംഭാവന ലഭിച്ച 22 കോടി രൂപയുടെ 15,000 ചെകുകള്‍ മടങ്ങി
അയോധ്യ: അയോധ്യ രാമക്ഷേത്ര നിര്‍മ്മാണത്തിനായി സംഭാവന ലഭിച്ച 22 കോടി രൂപയുടെ 15,000 ചെകുകള്‍ മടങ്ങി. രാമക്ഷേത്ര നിര്‍മാണ ഫണ്ട് ഉണ്ടാക്കാനുള്ള പ്രചാരണ സമയത്ത് വിശ്വ ഹിന്ദു പരിഷത്ത് (വി എച് പി) സമാഹരിച്ച ചെകുകളാണ് ഇവയെന്നാണ് രാമക്ഷേത്ര നിര്‍മാണ ട്രസ്റ്റിന്റെ ഓഡിറ്റ് റിപോര്‍ട് പറയുന്നത്.
സാങ്കേതിക പ്രശ്‌നങ്ങളും, ചെക്ക് നല്‍കിയ വ്യക്തിയുടെ അകൗണ്ടില്‍ പണമില്ലാത്തതുമാണ് ചെകുകള്‍ മടങ്ങാന്‍ കാരണമെന്നാണ് ടൈംസ് ഓഫ് ഇന്ത്യ റിപോര്‍ട് പറയുന്നത്.
ട്രസ്റ്റ് അംഗമായ അനില്‍ മിശ്രയുടെ വാക്കുകള്‍ പ്രകാരം, സാങ്കേതിക പ്രശ്‌നങ്ങള്‍ പരിഹരിച്ച്‌ മാറ്റാന്‍ പറ്റുന്ന ചെകുകള്‍ ആ തരത്തില്‍ തന്നെ പണമാക്കുവാന്‍ ബാങ്കുകളുമായി ശ്രമം നടത്തുന്നുണ്ട്. ബാക്കിയുള്ള ഭക്തരോട് വീണ്ടും പണം സംഭാവനയായി നല്‍കാന്‍ ആവശ്യപ്പെടും. മടങ്ങിയ ചെകുകളില്‍ 2,000ത്തോളം ചെകുകള്‍ അയോധ്യയില്‍ നിന്ന് തന്നെ സ്വീകരിച്ചവയാണ്.
വി എച് പി കഴിഞ്ഞ ജനുവരി 15 മുതല്‍ ഫെബ്രുവരി 17വരെ രാജ്യവ്യാപകമായി അയോധ്യ രാമക്ഷേത്രത്തിനായി നടത്തിയ ധന സമാഹരണം പരിപാടിയിലൂടെ 5000 കോടി സമാഹരിച്ചുവെന്നാണ് റിപോര്‍ടുകള്‍.
Related News