രാജ്യത്ത് കോവിഡ് വ്യാപനം കുറയുന്നു; 58,419 പുതിയ കൊവിഡ് രോഗികള്‍

Ajith.A

20 June 2021 10:44 AM

ന്യൂഡല്‍ഹി: രാജ്യത്തെ പ്രതിദിന കൊവിഡ് രോഗികളുടെ എണ്ണം കുറയുന്നു. കഴിഞ്ഞ 24 മണിക്കൂറിനിടെ വിവിധ സംസ്ഥാനങ്ങളിലായി 58,419 പേര്‍ക്കാണ് പുതുതായി വൈറസ് സ്ഥിരീകരിച്ചത്. കൊവിഡ് രണ്ടാം തരംഗം രാജ്യത്ത് പടര്‍ന്നുപിടിച്ച്‌ 81 ദിവസത്തിനിടെയുണ്ടായ ഏറ്റവും കുറഞ്ഞ പ്രതിദിന കണക്കാണിത്. കൊവിഡ് വ്യാപനം രൂക്ഷമായ ആദ്യഘട്ടങ്ങളില്‍ രാജ്യത്തെ പ്രതിദിന രോഗികള്‍ തുടര്‍ച്ചയായി നാലുലക്ഷത്തിന് മുകളിലായിരുന്നു. ഇത് പിന്നീടാണ് ഘട്ടം ഘട്ടമായി രോഗവ്യാപന തീവ്രത കുറയുകയും പുതിയ വൈറസ് കേസുകള്‍ ഒരുലക്ഷത്തിന് താഴേയ്‌ക്കെത്തുകയും ചെയ്തത്.

24 മണിക്കൂറിനിടെ 87,619 പേര്‍ക്കാണ് രോഗമുക്തി ലഭിച്ചത്. ആകെ രോഗമുക്തി നേടിയവര്‍ 2,87,66,009 പേരാണ്. കഴിഞ്ഞ ദിവസം മാത്രം 1,576 പേര്‍ക്ക് ജീവന്‍ നഷ്ടമായി. ഇതോടെ ആകെ മരണം 3,86,713 ആയി ഉയര്‍ന്നു. പ്രതിദിന രോഗികളില്‍ മുന്നിലുള്ളത് കേരളമാണ്.