'രാജ്യത്തിന് ഇനിയും ദുരിതമനുഭവിക്കാന്‍ കഴിയില്ല... എനിക്ക് തിരിച്ചുപോയി ഒരു ചായക്കട തുടങ്ങാം'; പ്രധാനമന്ത്രി മോദിയുടെ ട്വീറ്റ് കുത്തിപ്പൊക്കി നടന്‍ സിദ്ധാര്‍ത്ഥ്

News Desk

24 April 2021 08:31 PM

പ്രധാനമന്ത്രി നരേന്ദ്രമോദിയുടെ പഴയ ട്വീറ്റ് കുത്തിപ്പൊക്കി നടന്‍ സിദ്ധാര്‍ത്ഥ്. മോദി എന്ന വ്യക്തിക്കല്ല പ്രാധാന്യമെന്നും തനിക്ക് വേണമെങ്കില്‍ തിരികെപോയി ഒരു ചായക്കട തുടങ്ങാമെന്നും രാജ്യത്തിന് ഇനിയും ദുരിതം അനുഭവിക്കാന്‍ കഴിയുകയില്ലെന്നും പറഞ്ഞുകൊണ്ട് പ്രധാനമന്ത്രി 2014 ഏപ്രില്‍ 29ന് പോസ്റ്റ് ചെയ്ത ട്വീറ്റിലേക്കാണ് നടന്‍ ശ്രദ്ധ ക്ഷണിക്കുന്നത്. ഇന്ത്യയ്ക്ക് ശക്തമായ ഒരു സര്‍ക്കാരിനെ ആവശ്യമുണ്ട് എന്നും മോദി ഈ ട്വീറ്റില്‍ പറയുന്നുണ്ട്.

\'ഈ മനുഷ്യന്‍ പറയുന്ന എല്ലാ കാര്യത്തോടും ഞാന്‍ യോജിക്കുന്നു. നിങ്ങള്‍ക്കിത് വിശ്വസിക്കാന്‍ കഴിയുന്നുണ്ടോ?\' എന്ന പരിഹാസക്കുറിപ്പിനോടൊപ്പമാണ് സിദ്ധാര്‍ത്ഥ് പ്രധാനമന്ത്രിയുടെ ഈ ട്വീറ്റ് റീട്വീറ്റ് ചെയ്തിരിക്കുന്നത്. രാജ്യം കൊവിഡ് മൂലം അതീവ ഗുരുതരാവസ്ഥയിലേക്ക് പോയതിന് കേന്ദ്ര സര്‍ക്കാരിന് നേരെ വ്യാപക വിമര്‍ശനമുയരുന്ന സാഹചര്യത്തിലാണ് പ്രധാനമന്ത്രിയുടെ പഴയ ട്വീറ്റുമായി നടന്‍ രംഗത്തെത്തിയിരിക്കുന്നതെന്നതാണ് ശ്രദ്ധേയം.

ഇന്ത്യ അഭിമുഖീകരിക്കുന്ന കൊവിഡ് പ്രതിസന്ധി ചൂണ്ടിക്കാണിച്ചുകൊണ്ടും അക്കാര്യത്തില്‍ മോദിയെ വിമര്‍ശിച്ചുകൊണ്ടും സിദ്ധാര്‍ത്ഥ് ഇന്ന് രാവിലെയും ട്വിറ്റര്‍ വഴി രംഗത്തുവന്നിരുന്നു. ബിജെപി അധികാരത്തില്‍ നിന്നും പുറന്തള്ളപ്പെടുമ്ബോള്‍ മാത്രമേ രാജ്യം ശരിക്കും വാക്സിനേറ്റഡ് ആവുകയുള്ളൂ എന്നാണ് സിദ്ധാര്‍ത്ഥ് പറഞ്ഞത്. വെസ്റ്റ് ബംഗാളില്‍ ബിജെപി സര്‍ക്കാര്‍ അധികാരത്തിലേറിയാല്‍ എല്ലാവര്‍ക്കും സൗജന്യമായി വാക്സിന്‍ നല്‍കുമെന്ന് പറഞ്ഞുകൊണ്ടുള്ള പാര്‍ട്ടിയുടെ ബംഗാള്‍ ഘടകത്തിന്റെ പോസ്റ്റ് പങ്കുവെച്ചുകൊണ്ടായിരുന്നു നടന്റെ ട്വീറ്റ്.