കോവിഡ് വ്യാപനം അതിരൂക്ഷം; കോഴിക്കോട് കണ്ടെയ്ന്മെന്റ് സോണുകളില് 144 പ്രഖ്യാപിച്ചു
കോഴിക്കോട്: കോവിഡ് വ്യാപനം അതിരൂക്ഷമായി കൊണ്ടിരിക്കുന്ന സാഹചര്യത്തില് ജില്ലയിലെ കണ്ടെയ്ന്മെന്റ് സോണുകളില് 144 പ്രഖ്യാപിച്ച് കളക്ടര് ഉത്തരവായി.
കോവിഡ് നിയന്ത്രണങ്ങള് കര്ശനമായി പാലിക്കപ്പെടാത്ത സാഹചര്യത്തിലാണ് നടപടി. കണ്ടെയ്ന്മെന്റ് സോണുകളില് പൊതു, സ്വകാര്യ ഇടങ്ങളിലുള്ള കൂടിച്ചേരലുകള് ഇതുപ്രകാരം പൂര്ണമായി നിരോധിച്ചു.
തൊഴില്, അവശ്യസേവനാവശ്യങ്ങള്ക്കു മാത്രമാണ് ഇളവ് അനുവദിച്ചിട്ടുള്ളത്. നിയന്ത്രണങ്ങള് ലംഘിക്കുന്നവര്ക്കെതിരേ കര്ശന ശിക്ഷാനടപടികള് സ്വീകരിക്കാന് പോലീസ് മേധാവികള്ക്ക് കലക്ടര് നിര്ദേശം നല്കി.
കണ്ടെയ്ന്മെന്റ് സോണുകളിലെ ആരാധനാലയങ്ങളില് അനുഷ്ഠാനങ്ങളും ചടങ്ങുകളും നടത്താനേ പാടുള്ളൂ. ഇതില് അഞ്ചില് കൂടുതല് പേര് പങ്കെടുക്കരുത്.
കോവിഡ് മാനദണ്ഡങ്ങള് പാലിക്കപ്പെടുന്നുവെന്ന് ഉറപ്പുവരുത്താനായി നിയോഗിക്കപ്പെട്ട സെക്ടറല് മജിസ്ട്രേറ്റുമാര് കണ്ടെയ്ന്മെന്റ് സോണുകളില് നിരീക്ഷണത്തിനുണ്ടാവും.