ബിജെപി സ്ഥാനാര്ത്ഥി സാധ്യത പട്ടിക; സന്ദീപ് വാര്യര് കൊട്ടാരക്കരയില്, അമ്പലപ്പുഴയിൽ സന്ദീപ് വചസ്പതി, ധര്മ്മടത്ത് സികെ പത്മനാഭന്, സുരേഷ് ഗോപി വട്ടിയൂര്ക്കാവിൽ ?
തിരുവനന്തപുരം: സംസ്ഥാന നിയമസഭാ തിരഞ്ഞെടുപ്പിലേക്കായുള്ള ബിജെപി സ്ഥാനാര്ത്ഥി സാദ്ധ്യതാ പട്ടിക തയ്യാറായതായി റിപ്പോര്ട്ട്. ധര്മ്മടത്ത് സികെ പത്മനാഭന്, അമ്ബലപ്പുഴയില് സന്ദീപ് വചസ്പതി, കൊട്ടാരക്കരയില് സന്ദീപ് വാര്യര്, ചെങ്ങന്നൂരില് എംവി ഗോപകുമാര്, ഹരിപ്പാട്ട് ബി ഗോപാലകൃഷ്ണന് എന്നിങ്ങനെയാണ് സാദ്ധ്യതാ പട്ടികയിലെ പേരുകള്. കോന്നി മണ്ഡലത്തില് ബിജെപി സംസ്ഥാന അദ്ധ്യക്ഷന് മത്സരിച്ചേക്കുമെന്നാണ് സൂചകനകള്.
പാലക്കാട്ടേക്ക് പാര്ട്ടി പരിഗണിക്കുന്നത് ഇ ശ്രീധരനെയും ശോഭാ സുരേന്ദ്രനെയുമാണെന്നും വിവരമുണ്ട്. അതേസമയം, നിയമസഭാ തിരഞ്ഞെടുപ്പില് സിനിമാ നടനും എംപിയുമായ സുരേഷ് ഗോപിയും മത്സരിക്കണമെന്നാണ് ബിജെപി ആവശ്യപ്പെടുന്നത്.
തൃശൂരിലോ വട്ടിയൂര്ക്കാവിലോ അദ്ദേഹം മത്സരിക്കണമെന്നാണ് പാര്ട്ടി ആഗ്രഹിക്കുന്നത്. നിയമസഭാ തിരഞ്ഞെടുപ്പിലേക്കുള്ള ബിജെപിയുടെ സ്ഥാനാര്ത്ഥി പട്ടിക പൂര്ത്തിയായതായി കെ സുരേന്ദ്രന് ഒരു സ്വകാര്യ ചാനലിനോട് പറഞ്ഞിരുന്നു.
നേമം ഉരുക്കുകോട്ടയാണെന്നും പറഞ്ഞ ബിജെപി അദ്ധ്യക്ഷന്, മുന് മുഖ്യമന്ത്രി ഉമ്മന് ചാണ്ടിയെയും മുഖ്യമന്ത്രി പിണറായി വിജയനെയും നേമം മണ്ഡലത്തിലേക്ക് ക്ഷണിക്കുകയും ചെയ്തു. ആര് വരികയാണെങ്കിലും നേമത്ത് ബിജെപി തന്നെ ജയിക്കുമെന്നും അദ്ദേഹം പറയുന്നു. നേമം മണ്ഡലത്തില് ഉമ്മന് ചാണ്ടിയോ കോണ്ഗ്രസിന്റെ വടകര എംപി കെ മുരളീധരനോ എത്തും എന്നുള്ള വാര്ത്തകള് പ്രചരിക്കുന്നതിനിടെയാണ് ബിജെപി അദ്ധ്യക്ഷന്റെ ഈ പ്രസ്താവന.