സ്ത്രീകളുടെ ക്ഷേമത്തിന് 1509 കോടി; വനിത ശിശുവികസന വകുപ്പിന് 1053 കോടി; എല്ലാ നഗരങ്ങളിലും ഷീ ലോഡ്ജ്
തിരുവനന്തപുരം: സ്ത്രീകളുടേയും കുട്ടികളുടേയും വിവിധ ക്ഷേമ പദ്ധതികള്ക്കായി വലിയ തുകയാണ് ബജറ്റില് അനുവദിച്ചതെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. 2020-21ലെ ബജറ്റില് പൂര്ണമായും സ്ത്രീകള്ക്കുള്ള സ്കീമുകളുടെ അടങ്കല് 1509 കോടി രൂപയായും പദ്ധതി വിഹിതം 7.3 ശതമാനമായാണ് ഉയര്ത്തിയിട്ടുള്ളത്. 2016-17ല് പൂര്ണമായും സ്ത്രീകള്ക്കുള്ള സ്കീമുകളുടെ അടങ്കല് 760 കോടി രൂപയും പദ്ധതി അടങ്കലിന്റെ 4 ശതമാനവും മാത്രമായിരുന്നു. മറ്റു സ്കീമുകളില് സ്ത്രീകള്ക്കായുള്ള പ്രത്യേക ഘടകം കൂടി കണക്കിലെടുക്കുകയാണെങ്കില് മൊത്തം ചെലവുകളുടെ വനിതാ വിഹിതം 18.4 ശതമാനമാണ്. 2017-18ല് ഇത് 11.5 ശതമാനമായിരുന്നു. ഈ സ്ത്രീ പരിഗണന കേരള സര്ക്കാരിന്റെ ബജറ്റ് മുഖമുദ്രയായിട്ടുണ്ട്. കേന്ദ്രാവിഷ്കൃത സ്കീമുകളടക്കം 1053 കോടി രൂപയാണ് വനിത ശിശുവികസന വകുപ്പിന്റെ അടങ്കല് തുക. നിര്ഭയ ഹോമുകളുടെ പരിപാലനത്തിനുള്ള സഹായം 10 കോടി രൂപയായി ഉയര്ത്തിയിട്ടുണ്ട്.
കെട്ടിട സൗകര്യങ്ങളും കുട്ടികളുമില്ലാത്ത അങ്കണവാടികളെ സംയോജിപ്പിച്ച് പകല് മുഴുവന് പ്രവര്ത്തിക്കുന്ന മാതൃകാ കേന്ദ്രങ്ങളാക്കും. തെരഞ്ഞെടുക്കപ്പെട്ട അങ്കണവാടികളില് പ്രത്യേക വെല്ലുവിളികള് നേരിടുന്ന കുട്ടികള്ക്കുവേണ്ടി സൗകര്യമൊരുക്കും. സ്മാര്ട്ട് അങ്കണവാടി പദ്ധതി തുടരുന്നതാണ്.
വനിത വികസന കോര്പറേഷന്റെ നേതൃത്വത്തില് വര്ക്കിംഗ് വിമന്സ് ഹോസ്റ്റലുകളില് യാത്രക്കാരികള്ക്ക് സുരക്ഷിത മുറികള് ഒരുക്കും. സ്ത്രീകള് ഉല്പ്പാദിപ്പിക്കുന്ന വസ്തുക്കളുടെ വിപണനത്തിനായി ജന്ഡര് പാര്ക്കില് ഇന്റര്നാഷണല് ട്രേഡ് സെന്റര് ആരംഭിക്കുന്നതാണ്.
ഇതോടൊപ്പം എല്ലാ നഗരങ്ങളിലും ഷീ ലോഡ്ജ് ആരംഭിക്കും. വനിതാ സിനിമാ സംവിധായകര്ക്ക് 3 കോടി രൂപ ധനസഹായം തുടരും. കുടുംബശ്രീക്ക് 4 ശതമാനത്തില് 3000 കോടി രൂപ വായ്പ അനുവദിക്കുമെന്നും ധനമന്ത്രി തോമസ് ഐസക്ക് ബജറ്റ് പ്രസംഗത്തില് പറഞ്ഞു.
ട്രാന്സ്ജെന്ഡേഴ്സിനായി സംസ്ഥാന ബജറ്റില് പ്രത്യേക പ്രഖ്യാപനം. ട്രാന്സ്ജെന്ഡേഴ്സിന്റെ ഉന്നമനം ലക്ഷ്യമാക്കിയുള്ള മഴവില്ല് പരിപാടിക്ക് അഞ്ച് കോടി രൂപ വകയിരുത്തി.