118 എ പിന്‍വലിക്കുക; പൊലീസ് നിയമഭേദഗതിക്കെതിരെ നടി പാര്‍വതി
പൊലീസ് നിയമഭേദഗതിക്കെതിരെ കൂടുതല്‍ പേര്‍ രംഗത്ത്. 118 എ പിന്‍വലിക്കണമെന്ന് നടി പാര്‍വതി രംഗത്ത് ആവശ്യപ്പെട്ടു. പ്രശസ്‌ത മാധ്യമപ്രവര്‍ത്തകന്‍ ശശികുമാറിന്റെ ട്വീറ്റ് റിട്വീറ്റ് ചെയ്‌തുകൊണ്ടാണ് 118 എ പിന്‍വലിക്കണമെന്ന് പാര്‍വതി ആവശ്യപ്പെട്ടിരിക്കുന്നത്. പൊലീസ് നിയമഭേദഗതി കൊണ്ടുവന്ന സര്‍ക്കാര്‍ തീരുമാനം നിര്‍ഭാഗ്യകരമാണെന്നും 118 എ അഭിപ്രായ സ്വാതന്ത്ര്യത്തിനും മാധ്യമ സ്വാതന്ത്ര്യത്തിനും എതിരാണെന്നും ആരോപിക്കുന്ന ശശികുമാറിന്റെ ട്വീറ്റാണ് പാര്‍വതി റിട്വീറ്റ് ചെയ്തത്.
സിനിമാ താരങ്ങള്‍, ആക്ടിവിസ്റ്റുകള്‍ തുടങ്ങി നിരവധി സ്ത്രീകള്‍ക്കെതിരായ വ്യാപക സൈബര്‍ ബുള്ളിയിങ് പ്രതിരോധിക്കുക എന്ന ലക്ഷ്യത്തോടെയാണ് സംസ്ഥാന സര്‍ക്കാര്‍ 118 എ കൊണ്ടുവന്നത്. ഏറ്റവും കൂടുതല്‍ സൈബര്‍ ബുള്ളിയിങ്ങിന് ഇരയായ ഒരു താരം കൂടിയാണ് പാര്‍വതി. 118 എ ക്കെതിരെ പാര്‍വതി തന്നെ രംഗത്തെത്തിയത് ഏറെ ചര്‍ച്ചയായിരിക്കുകയാണ്.
അതേസമയം, പൊലീസ് നിയമഭേദഗതിയില്‍ തിരുത്തലിന് സാധ്യത. പൊലീസ് നിയമഭേദഗതിക്കെതിരെ വ്യാപകമായ വിമര്‍ശനം ഉയര്‍ന്ന സാഹചര്യത്തിലാണ് ഭേദഗതിയിലെ വിവാദ ഭാഗത്ത് തിരുത്തല്‍വരുത്താന്‍ സര്‍ക്കാര്‍ ആലോചിക്കുന്നത്. സമൂഹമാധ്യമങ്ങളിലെ അധിക്ഷേപമെന്ന പേരില്‍ നിയമം കര്‍ക്കശമാക്കുന്നതില്‍ തിരുത്തല്‍ കൊണ്ടുവരാനാണ് സാധ്യത. പൊലീസ് നിയമഭേദഗതിക്കെതിരെ ഉയര്‍ന്ന അഭിപ്രായങ്ങളും നിര്‍ദേശങ്ങളും കേരളത്തിലെ ഇടത് സര്‍ക്കാര്‍ തീര്‍ച്ചയായും പരിഗണിക്കുമെന്ന് സിപിഎം കേന്ദ്ര നേതൃത്വം വ്യക്തമാക്കി. മാത്രമല്ല, ഇടതുപക്ഷത്തുനിന്ന് തന്നെ ഇതിനെതിരെ എതിര്‍പ്പുകളുണ്ട്. നിയമ ഭേദഗതിയില്‍ വ്യക്തത കുറവുണ്ടെന്നാണ് സിപിഐ പറയുന്നത്.
പൊലീസ് നിയമഭേദഗതിക്കെതിരെ കോടതിയെ സമീപിക്കാനാണ് പ്രതിപക്ഷ തീരുമാനം. അഭിപ്രായ സ്വാതന്ത്ര്യത്തിനെതിരെയുള്ള കടന്നുകയറ്റമാണ് നിയമഭേദഗതി കൊണ്ട് സര്‍ക്കാര്‍ ഉദ്ദേശിക്കുന്നതെന്ന് പ്രതിപക്ഷം വിമര്‍ശിച്ചു. ഇടതുപക്ഷ സര്‍ക്കാര്‍ കൊണ്ടുവന്ന ഓര്‍ഡിനന്‍സ്, മാധ്യമ സ്വാതന്ത്ര്യത്തിനു മൂക്കുകയറിടുന്നതും, ഇന്ത്യന്‍ ഭരണഘടന ഉറപ്പ് നല്‍കുന്ന അഭിപ്രായ സ്വാതന്ത്ര്യമുള്‍പ്പെടെയുള്ള മൗലികാവകാശങ്ങളുടെ നഗ്നമായ ലംഘനവുമാണെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു.
Related News
വേടന്‍റെ പോസ്റ്റ് ലൈക്ക് ചെയ്തതില്‍ ക്ഷമാപണവുമായി പാര്‍വതി തിരുവോത്ത്
പാര്‍വതി തിരുവോത്തിനെതിരെ ഗണേശ് കുമാര്‍
നടി പാര്‍വതി തിരുവോത്ത് 'അമ്മ'യില്‍ നിന്ന് രാജിവച്ചു