അഷ്ടമിച്ചിറയിൽ 3 പേരെ ആക്രമിച്ച തെരുവ് നായക്ക് പേവിഷബാധ സ്ഥിരീകരിച്ചു

അഷ്ടമിച്ചിറയിൽ കഴിഞ്ഞദിവസം ആളുകളെയും മറ്റ് മൃഗങ്ങളെയും പരക്കെ ആക്രമിച്ച തെരുവ് നായക്ക് പേവിഷബാധ സ്ഥിരീകരിച്ചു. ഒരു ഭിന്നശേഷിക്കാരൻ ഉൾപ്പെടെ മൂന്ന് പേർക്കാണ് ഈ നായയുടെ കടിയേറ്റത്. പ്രദേശത്തെ നിരവധി തെരുവുനായ്ക്കളെയും ഈ നായ കടിച്ചുകീറിയതായി നാട്ടുകാർ പറയുന്നു.
കഴിഞ്ഞ ദിവസമാണ് അഷ്ടമിച്ചിറയിൽ വഴിപോക്കർക്ക് നേരെ തെരുവ് നായയുടെ അപ്രതീക്ഷിത ആക്രമണമുണ്ടായത്. പരിക്കേറ്റ മൂന്ന് പേരും ഉടൻ തന്നെ ആശുപത്രിയിൽ പ്രവേശിപ്പിക്കപ്പെടുകയും പ്രതിരോധ വാക്സിൻ സ്വീകരിക്കുകയും ചെയ്തു. നാട്ടുകാരുടെ പരാതിയെത്തുടർന്ന് കഴിഞ്ഞദിവസം തന്നെ പഞ്ചായത്ത് അധികൃതർ ഇടപെട്ട് നായയെ പിടികൂടിയിരുന്നു. എന്നാൽ വൈകുന്നേരത്തോടെ നായ ചത്തുപോവുകയായിരുന്നു.
ചത്ത നായയുടെ സ്രവം തുടർന്ന് അടിയന്തര രാസപരിശോധനയ്ക്ക് അയച്ചിരുന്നു. ഇന്ന് പുറത്തുവന്ന പരിശോധനാ ഫലത്തിലാണ് നായ്ക്ക് പേവിഷബാധയുണ്ടായിരുന്നു എന്ന് ഔദ്യോഗികമായി സ്ഥിരീകരിച്ചത്.
പേവിഷബാധ സ്ഥിരീകരിച്ച സാഹചര്യത്തിൽ അഷ്ടമിച്ചിറയിലും പരിസര പ്രദേശങ്ങളിലും അധികൃതർ കടുത്ത ജാഗ്രതാ നിർദേശം പുറപ്പെടുവിച്ചിട്ടുണ്ട്. ഈ നായയിൽ നിന്ന് മറ്റ് തെരുവ് നായ്ക്കൾക്കും കടിയേറ്റിട്ടുള്ളതിനാൽ ജനങ്ങൾ അതീവ ശ്രദ്ധ പുലർത്തണം. പ്രദേശത്തെ വളർത്തുമൃഗങ്ങൾക്ക് എന്തെങ്കിലും തരത്തിലുള്ള ലക്ഷണങ്ങളോ അസ്വാഭാവികതയോ കണ്ടാൽ ഉടൻ തന്നെ മൃഗസംരക്ഷണ വകുപ്പ് അധികൃതരെ വിവരമറിയിക്കണമെന്നും നിർദേശമുണ്ട്.